Diskute Malu Tan Animal, Tia Dada Subrinu Ba Tribunal

DILI, STLNEWS.co – Diskute malu tanba animal, lezada inisial DC nuudar tian, tenke dada nia subrinu inisial JM ba hatan iha tribunal, tanba deit arguidu kesi karau iha lezada nia uma.

Liu husi sala julgamentu, Tribunal Distrital Dili (TDD) iha loron Kinta nee, antes atu tama ba iha julgamentu, tribunal singular haree katak, krime neebe akuza ba iha arguidu, nia natureza semi publiku, lei fo dalan atu bele dada fila.

Tanba nee, tribunal tenta halo konsiliasaun ba iha lezada, maibe lezada la aseita atu dada fila krime nee, nunee tribunal hakat ba iha julgamentu.

Tuir faktus katak, iha loron 8 fulan Janeiru tinan 2020 iha Aileu, arguidu ba kesi karau iha lezada nia uma oin, no karau nee kesi besik lezada nia bibi, too karau talin bobar bibi.

Lezada fo hatene ba nia oan inisial PC atu kore tiha karau nia talin, hodi ba kesi dook tiha.

Maibe la kleur arguidu nia oan inisial AB kesi fila fali karau besik ba lezada nia bibi, ho ida nee lezada koalia ba AB, no arguidu mos mosu hodi deskute malu ho lezada.

Iha diskute malu nee, arguidu koalia ba lezada dehan, mangame sei baku lezada no baku nia oan nain tolu nee mos.

Rona ida nee, lezada sente tauk no la hakmatek iha nia moris.

Tanba nee lezada ba hatoo keixa, no Ministeriu Publiku akuza arguidu ba iha krime ameasa neebe previstu iha artigu 157 husi Kodigu Penal.

Hatan ba faktus nee, arguidu deklara katak, sira diskute malu deit, maibe la ameasa lezada.

Arguidu konfesa tan, iha momentu diskute malu, diretor eskola mak sai mai dudu ses tiha lezada.

Lezada konfirma faktus katak, arguidu istori malu beibeik ho nia ona, tanba nee mak lezada hetan ameasa, atu baku nia uma rahun, no baku nia oan no ikus lezada deside ba hato’o keixa.

Rona tiha husi parte rua, tribunal adia ba loron seluk, hodi rona sasin.

Audensia nee prezide husi Juiz Singular Alvaro, Ministeriu Publiku reprezenta husi Prokuradora Bemvinda do Rojario, arguidu hetan asistensia legal husi Defensor Publiku.*

Reportajen: Terezinha De Deus

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 20 Outubru: Kazu Foun Hamutuk 16

DILI, STLNEWS.co - Ohin loron Sentru Integradu Jestaun Krize (SIJK) rejistu kazu foun hamutuk 16, iha Dili 14 no munisipiu seluk iha nain 2. "Kazu...

Membru F-FDTL Foun Ida Halai Lakon

DILI, STLNEWS.co - Membru foun FALINTIL Forsa Defeza Timor Leste (F-FDTL) ida ohin halai lakon iha sentru formasaun Metinaro tanba la augenta ho instrusaun...

Maromak La Dukur Ba Nia Ema

DILI, STLNEWS.co - Maromak mak iha kbiit tomak sempre akompanha ema hotu iha tempu saida deit no nunka dukur ba ema, tanba ne'e presiza...