Hahan Laiha, Filomena Hakotu Vida Ho Tara Aan

Matebian ho naran kompletu Filomena Fatima, hakotu nia vida liu husi tara aan, tanba deskonfia hahan laiha impaktu husi serka sanitaria (SS). (Foto: STL/Guilhermina Franco)

DILI, STLNEWS.co – Matebian ho naran kompletu Filomena Fatima, hakotu nia vida liu husi tara aan, tanba deskonfia hahan laiha impaktu husi serka sanitaria (SS).

Tuir informasaun neebe iha katak, serka sanitaria nee defikulta tebes ba nia moris, mak halo matebian nee hili dalan hodi hakotu vida liu husi tara aan.

Matebian hela mesak ho nia oan, nia kaben iha hela munisipiu Ermera labele mai no haruka hahan mai tanba SS.

“SS nee halo matebian laiha hahan, nunee horbainruak ba husu hahan ba vizinu, ikus mai halo, atu ba husu tan nia sente moe, halo nia sente defisil tebes, mak tara aan,” informa Jacob, nuudar vizinu neebe hela besik ho matebian ba STL, iha Foho Leten Maslidun, Tasi-Tolu, Sesta (02/04/2021).

Nia dehan, governu implementa SS, maibe laiha responsabilidade ba nia povu. implementa SS nee tau netik matan ka responsabilidade netik ba nia povu lae, maibe husik deit povu hamlaha iha situasaun agora, tanba realidade neebe hatudu katak inan feton nee mate tanba hahan laiha.

Foto: STL/Guilhermina Franco

Nia haktuir, matebian mate laos tanba problema ruma, maibe tanba hahan laiha, matebian nia laen iha foho labele haruka hahan mai, nia mos labele ba foho. Nunee hanoin barak ikus matebian hakotu vida liu husi tara aan.

Tuir nia, haree ba realidade nee hatudu katak, estadu laiha kapasidade tanba implementa SS, rezultadu halo povu sira mate tanba hamlaha.

Nunee mos tuir inan hakiak husi matebian, Florentina Maia Soares haktuir, matebian tara aan tanba hahan laiha, i matebian hela mesak ho nia oan, tanba nia katuas oan ba tiha foho.

‘Horbainrua nee nia ba husu hau dehan, haree ema balu fos iha karik ajuda foti lai, maibe hau dehan ba nia, hau ba husu ema la fo, nunee nia mos fila mai uma, ikus mai kala hanoin barak entaun nia tara aan”, haktuir inan ferik nee.

Tuir nia, matebian iha oan nain 4, maibe nia oan ida ho nia aman iha foho hela, nain ida ho inan hakiak, no nia hela ho nain 2. Matebian antes nee servisu iha loja, maibe tanba estadu emerjensia entaun loja hapara tiha, ikus mai nia ba servisu fase fali ema nia roupa, maibe tanba serka sanitaria nunee nia laiha osan atu sosa hahan.

Nunee mos Joanita Leite nuudar vizinu haktuir, “Horbainruak matebian mai husu fos ba hau dehan ajuda fo fos lai, tanba nia laiha ona fos, atu ba foho mos ladiak tanba SS dalan taka, entaun hau fo fos lata 2 ba nia, nunee horisehik ami lahetan nia ona, no ami haree nia odamatan taka too ohin dadersan rona dehan nia tara aan,” katak Joanita.

Tuir observasaun STL haree katak, iha matebian nia uma laran mamuk laiha hahan, iha deit bikan kanuru ho masa mamuk, maibe laiha hahan hanesan fos ou batar ruma.

Foto: STL/Guilhermina Franco

Entretantu informasaun neebe STL simu husi familia katak, hafoin matebian tara aan, forensik too kedas iha uma matebian, maibe familia hatoo katak, matebian tara aan tanba laiha hahan tanba impaktu husi SS. Nunee forensik foti dadus hodi koopera ho familia, i halao revista mos ba matebian nia uma laran haree laiha hahan, nunee forensik koopera ho familia hodi entrega mate isin ba familia, para halao serimonia funeravel. Matebian mate ho idade 30 resin no husik hela oan nain 4, matebian husi munisipiu Ermera, Suku Estadu, matebian hela kleur ona iha Dili.*

Reportajen: Madalena Horta/Guilhermina Franco
Editora: Domingas Gomes

LEAVE A REPLY

Please enter your comment!
Please enter your name here