Joven Labele Estraga Fasilidade Publiku

Portavoz Komandu Jeral Polisia Nasional Timor Leste (PNTL), Superintendente Xefe Arnaldo de Araujo. (Foto: STL/Claudios de Jesus)

DILI, STLNEWS.co – Portavoz Komandu Jeral Polisia Nasional Timor Leste (PNTL), husu ba juventude sira atu labele estraga fasilidade publiku, tanba PNTL sei atua wainhira iha keisa ruma.

Liu husi konferensia ba imprensa, portavoz Komandu Jeral Polisia Nasional Timor Leste (PNTL), Superintendente Xefe Arnaldo de Araujo informa ba juventude sira atu labele estraga fasilidade, neebe tau iha estrada publiku tantu jardin. Ba joven sira neebe maka tenta estraga fasilidade publiku neebe governu prepara ona, iha lei neebe kondena ba atitude hirak nee.

“Juventude sira ita hotu hatene katak kodigu penal artigu 259 nee dehan katak, dano agravado neebe maka halo aat ka estraga fasilidade publiku nian hetan prizaun tinan 2 ka 8 ou hetan multa,” hatete nia iha Komando Polisia Nasional Timor Leste (PNTL), Caikoli, Dili, Kinta, (21/01/2021).

Portavoz nee hatutan, dala barak fasilidade neebe g9vernu oferese ona ba iha fatin publiku hanesan iha jardin, merkadu, iha fatin jinastiku nian, ema neebe gosta atu estraga fasilidade publiku nian ida nee PNTL sei atua wainhira iha keisa ruma.

Nia espera katak ho informasaun neebe parte polisia alerta nee bele, fo hanoin atu juventude sira bele kontrolu atitude hirak nee.

Polisia Nasional Timor Leste (PNTL), sei foti medida hodi bele hare ba atitude husi joven sira neebe maka tenta estraga ona fasilidade publiku, tanba tenta hamate dezenvolvimentu nasaun nian.

“Dala barak ita nia alin joven sira nee la iha konsensia, tanba nee maka sira tenta para estraga deit saida maka governu tau hela iha fatin publiku, ami sei atua se kuandu iha keisa ruma,” dehan nia.

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here