KPMD Kontinua Pasa Revista Iha Tempu Kalan

Foto: Media PNTL

DILI, STLNEWS.co – Komandante Polisia Munisipiu Dili, Superintendente Xefe Henrique da Costa hatete, sira sei kontinua halo pasa revista ba motorista neebe dokumentus la iha.

“Motorista sira neebe lori motor, sapamatrikula la iha, la uza espelo, i balun la uza kapaseti, ami sei prende sira nia motor hodi husu tuir atu sira bele aprezenta dokumentus validus husi motor neebe sira sae,” dehan nia ba jornalista sira, iha nia knaar fatin Caicoli, Dili, Kuarta (27/01/2021).

Nia dehan, atividade ida nee maka sira sei halo iha tempu operasaun kalan, operasaun neebe sira halo laos ba motor deit maibe kareta mos.

“Ekipa operasaun neebe halao iha kalan nee kompostu husi Komandu PNTL Munisipiu Dili, Unidade Espesial Polisia (UEP), Polisia Maritima no Unidade Polisia Fronteira (UPF),” dehan nia.

Nia haktuir, Komandu PNTL Munisipiu Dili, kontinua fo apoiu hodi halo atividade patrulla lao ain no patrulla uza kareta nunee bele asegura ba ema hotu, katak kapital Dili segura liutan iha tempu kalan. Ita hare ba iha informasaun neebe espalla iha rede sosial horseik no horibainruak fo sai katak iha area balun ita labele halo movimento iha tempu kalan tanba ema tuda malu.

“Tanba nee hakarak informa ba publiku katak Dili seguru ba ema hotu atu halo movimento ka halo atividade saida deit livre, maibe bainhira iha ema ruma halo problema ka prepara hela halo problema, husu komunidade sira atu informa kedas ba parte polisia, nunee ita bele responde ho diak,” tenik nia.*

Reportajen: EST/DEL
Editor: Crisogono Magalhães

LEAVE A REPLY

Please enter your comment!
Please enter your name here