Minoridade Labele Lori Kareta – Motor

Komandante Polisia Nasional Timor-Leste (PNTL), Munisipiu Dili Superintendente Xefe Henrique da Costa. (Foto: STL/Claudios de Jesus)

DILI, STLNEWS.co – Polisia Nasional Timor Leste husu ba inan ho aman sira fo atensaun ba oan sira neebe minoridade tenta lori ka kondus kareta, tanba bainhira PNTL pasa revista hetan sei kaptura.

Komandante Polisia Munisipiu Dili, Superentendente Xefe Henrique da Costa hatete, hare ba labarik minoridade neebe kontinua ho barani kondus kareta ho motor iha tereinu, parte polisia nafatin halo pasa revista bainhira hetan sei kaptura hodi halo prosesu.

“Karik hanesan ita hetan labarik minoridade sira kondus kareta ho motor, ita sei halo prosesu ba sira tuir Lei neebe maka iha,” hateten Superentendente Xefe Henrique, ba jornalista sira liu husi konferensia ba imprensa, iha Komandu Polisia Munisipiu, Dili, Tersa (12/01/2021).

Nia hatutan, operasaun passa revista husi parte tranzitu ba loron horiseik nian, detein motorizada hamutuk 61.

Komandante nee mos husu ba inan aman hotu, hodi bele kopera no kumpri ba regras neebe iha.

“Inan aman sira maka tenke tau atensaun no labele laran metin katak, buat hotu nee husi parte polisia maka sei halo kontrolu,” dehan Komandante nee.

Iha biban nee komandante Henrique mos hatete, se kuandu inan aman maka la iha kontrolu ba sira nia oan, ho nunee labarik sira kondus transporte la kumpri regras no hetan dezastre ruma, bele impaktu ba sira nia vida. Tanba nee inan aman sira presiza antisipa no nafatin fo kontrolu, atu labele akontese buat hirak neebe maka ema hotu la espera.*

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here