Negosiantes Faan Katupa Iha Dalan Ninin

Negosiante sira faan katupa no naan iha dalan ninin parte Comoro, Bairo-Pite, maibe negosiante sira nee balun uza maskra no balun la uza maskra. (Foto: STL/Jacinta Sequeira)

DILI, STLNEWS.co – Negosiante sira faan katupa no naan iha dalan ninin parte Comoro, Bairo-Pite, maibe negosiante sira nee balun uza maskra no balun la uza maskra.

“Maske ita iha EE nian laran, ami hanesan negosiante kontinua nafatin halo ami nian atividades negosiu, hanesan faan katupa ho nuu iha dalan ninin, tanba ita hatene katak, orsida kalan tama ona tinan foun, ema hotu hamutuk ho familia selebra tinan foun ida nee ho familia, katupa neebe mak ami faan balun ho folin $2, nuu mos ami faan $2 dolar hotu, tanba ami mos sosa tutan husi ema seluk,” dehan Mariano Mendes hanesan negosiante faan katupa ba STL iha Bairo-Pite Dili Kinta (31/12/2020).

Iha fatin hanesan, Rosario de Jesus, hanesan negosiante faan naan, dehan, naan neebe sira faan kilo ida ho folin $8, tanba sira laos foin mak faan sasan sira nee, maibe kada tinan ami sempre oho fahi ou karau para bele faan.

“Ami sei faan too loraik, ita hatene katak, orsida kalan ita nian misa laiha too aban dia 1 Janeiru, ita sei akompania misa liu husi televizaun no radio,” dehan nia.

Tuir observasaun STL iha terenu Kinta (31/12/2020), konsumedor barak sosa katupa no naan sira nee husi negosiante sira, hahu husi area Bairo Pite, Fatuhada tama too Comoro, dalan ninin nakonu ho negosiante sira faan katupa.*

Reportajen: Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here