Oan Faan Sasan, Kaer Inan-Aman Sulan Kadeia

Deputada Bankada CNRT, Fernanda Lay hatete, bainhira oan faan sasan iha dalan ninin tenke kaer inan ho aman lori ba sulan iha kadeia, tanba labarik tinan minoridade nee responsabilidade inan-aman sira nian. (Dok: STL)

DILI, STLNEWS.co – Deputada Bankada CNRT, Fernanda Lay hatete, bainhira oan faan sasan iha dalan ninin tenke kaer inan ho aman lori ba sulan iha kadeia, tanba labarik tinan minoridade nee responsabilidade inan-aman sira nian. Dehan nia ba jornalista sira, iha Parlamentu Nasional, Kuarta (23/12/2020).

“Hau nia pergunta labarik sira nia hakarak maka ba buka osan ka, ou inan aman maka haruka, sekarik inan aman, entaun nee inan aman nia responsabilidade, kaer inan aman tau ba kadeia,” dehan nia.

Nia dehan, karik inan aman labele estadu iha ona apoiu bolsa da mae para fo sira eskola, se inan aman maka lakohi sira eskola haruka sira ba para hodi buka osan hodi ajuda inan aman nee loos ka.

“Hau hanoin ema ruma tenke hatete nee loos ka sala, dalaruma hau la fiar. Tanba sira mai faan lori has ou lori forai hau sosa, nia ba bolu tan nia maluk mai, hau hakfodak. Nia maka inisiativa rasik para hetan osan rahun balun hodi hola buat ruma, ou ita hatene inan aman maka haruka ka halo nusa,” tenik nia.

Nia firma, ida nee tenke iha levantamentu ida tanba iha problema ida sira hatete dehan, labarik sira faan sasan hori-bainhira baku nee ema Oecusse, nee loos duni ka lae.

Entaun atu deside katak, nee loos ka sala tenke iha levantamentu ida ba peskiza para hodi hatete. Nee governu tenke haree para ita iha dadaus atu deside atu halo saida ba ida nee.*

Reportajen: Domingas Soares
Editor: Ekipa STL

LEAVE A REPLY

Please enter your comment!
Please enter your name here