Patraun Loja Hadomi Hapara Traballador Ida Tanba Pozitivu Covid-19

DILI, STLNEWS co – Patraun Loja Hadomi hapara traballdor nain ida, tanba traballdor nee pozitivu Covid-19, no deskonfia nia maka lori moras Covid-19 ba traballador sira seluk.

Tuir Traballador Zeferino Brites N. Soares, nudar kondutor iha loja Hadomi Kuluhun hatete, nia sai ona hanesan traballador permanente, tanba simu salariu mensalmente iha loja refere dezde iha fulan Fevereiru.

“Hau lamenta ho demisaun irasional neebe Patraun loja Hadomi Rawindra halo mai hau, sem rajaun. Hau afetadu Covid hodi kauza ba patraun no traballador hotu-hotu neebe serbisu iha loja tenki hetan swab,” dehan nia ba jornalista iha Salaun FONGTIL, Caicoli, Dili, Kuarta (02/06/2021).

Traballdor nee esplika tuir kronolojia, iha loron Kuarta, 24 Marsu 2021, traballdor nee komesa moras isin manas, nunee traballador nee ba hasai teste swab iha Ospital Nasional Guido Valadares, hafoin ida nee rezultadu sai katak traballador nee pozitivu ba Covid-19.

“Nunee iha Sesta dader oras tuku 8 loron 2 Abril, hau simu telefone husi HNGV hatete, hau pozitivu Covid-19. Hafoin iha tuku 10 dader nee, hau simu tan telefone husi doutor Helio husi Vera Cruz informa hau pozitivu Covid-19, prepara an ona para ambulansia ba tula lori ba izolamentu kuarentena Tasi Tolu,” dehan nia.

Hafoin traballador nee sai husi karantina iha loron 16 Abril lokraik, iha kalan nee kedas traballador nee kontaktu ba jestor loja nian hodi informa, nia sai ona husi kuarentena no prontu ona atu serbisu fali hanesan normal, maibe loja nain dehan, nia labele servisu ona, tanba traballador nee moras Covid-19, tanba nee traballador nonok deit mezmu-ke nia sente halo diskriminasaun ba nia.

Ho aktu nee traballador lamenta liu tanba, traballadores 21 husi loja Hadomi nian neebe afetadu mos moras Covid-19 no tama izolamentu, depois de sai tama fali servisu hanesan normal. Wainhira sira fila husi kuarentena, diferente traballador nee mak patraun loja lasimu ona, tanba ho razaun katak nia maka lori moras Covid-19 ba loja Hadomi.

Nia deklara, ho aktu ida neebe patraun Rawindra halo ba traballador nudar aktu diskriminativu ida neebe prejudika tebes nia moris no direitu fundamental, tanba nia mos hanesan traballador Timor-oan.

Hatan ba kestaun nee Diretur Loja Hadomi, Mariano de Deus esplika, traballador refere laos lori kareta kompania nian, maibe lori kareta privadu no sai kondutor privadu ba manager husi loja Hadomi.

“Hau prontu atu ba hasoru instituisaun relevante sira, SEFOPE, PDHJ, hodi bele klarifika lolos konaba problema nee,” tenik nia.

Nia esplika, servisu hotu hotu iha nia regulamentu, tanba nee nia prontu atu koalia, wainhira instituisaun relevante sira bolu nia.*

Reportajen: Santina Castro
Editor: Domingas Gomes

LEAVE A REPLY

Please enter your comment!
Please enter your name here

NEWS UPDATE

SEJD Enkontru Ho Lider Artemarsiais

DILI, STLNEWS.co - Sekretariu Estadu Juventude no Desportu (SEJD), halao enkontru ho lider artemarsiais sira iha Timor Leste, kona ba rekezitus artemarsiais nian neebe...

Lori Maromak Nia Domin Ba Ema Hotu

DILI, STLNEWS.co - Nuudar sarani neebe diak iha moris, tenke sai valeta ba ema hotu, atu lori Maromak nia grasa no domin ba maun...

Vota Abstensaun Myanmar, TL Laiha Sentimentu Humana

DILI, STLNEWS.co - Relasiona ho Ministra Negosoiu Estranjeiru no Kooperasaun (MNEK), neebe mak vota abstensaun ba nasaun Myanmar, akademista konsidera Timor Leste laiha sentimentu...
%d bloggers like this: