Prepara Bee Ba Komprador

Ho implementasaun serka sanitariu durante loron hitu iha kapital Dili, loja no supermerkadu sira hahu prepara ona bee ba komprador sira, fase liman antes tama loja laran. (Foto: STL/Jacinta Sequeira)

DILI, STLNEWS.co – Ho implementasaun serka sanitaria durante loron hitu iha kapital Dili, loja no supermerkadu sira hahu prepara ona bee ba komprador sira, fase liman antes tama loja laran.

Tuir observasaun STL iha terenu kinta (11/03/2021) neee katak, loja no supermerkadu hirak neebe lokaliza iha area Tasi-tolu, Fomentu, Hudi Laran, Perumnas, Bairru-Pite, Colmera tama too iha Audian, sira prepara ona fasilidade hanesan bee, sabaun ba komprador sira, atu nunee bele fase liman antes tama sosa sasan iha loja laran, maibe iha area neebe mak mensiona, loja balun sei kontinua taka, maibe balun loke nafatin.

Maski estadu emerjensia dahuluk iha tinan kotuk ba pandemia Covid-19, iha fatin publiku, hanesan Mandarin, Tasi-tolu, governu prepara bee ho sabaun ba populasaun sira, maibe dadaun iha implementasaun serka sanitaria neebe governu implementa durante loron hitu iha kapital Dili, maibe fatin publiku hirak nee seidauk iha bee ba komunidade sira.

Loja sira iha parte Audian kontinua loke nafatin, iha implementasaun serka sanitaria ba Covid-19, maibe komprador sira menus tama sosa sasan, maibe loja, supermerkadu sira iha area Audian kontinua halo sira nian atividades lao hanesan bai-bain, inklui komunidade sira neebe faan sira nian sasan iha loja oin.

Komprador sira neebe tama sosa sasan iha loja no supermerkadu sira, balun kontinua kumpri regras, hodi fase liman no uza maskra, maibe balun kontinua la uza, aleinde nee mos movimentu komunidade iha area Audian menus, kompara ho loron bai-bain, parte Audian sempre rame.

Aleinde nee loja sidadaun xineza sira nian iha parte estadium nian kontinua loke nafatin, maibe kontinua menus komprador neebe sosa, komprador sira menus, tanba ema hotu kumpri regras, oinsa hakmatek iha uma, tanba numeru kazu pozitivu Covid-19 kada loron aumenta ba bebeik iha kapital Dili.

Iha parte Audian sirkulasaun transporte publiku laiha, maibe transporte privadu hanesan motor no kareta kontinua halo sirkulasaun nafatin, maibe menus la hanesan ho loron bai-bain, neebe transporte barak mak halo sirkulasaun iha area refere.

Bainhira STL tenta atu halo intervista ho Manajer Supermerkadu W-four Audian la konsege tanba laiha fatin, maibe traballador iha supermerkadu refere kontinua halo servisu hanesan bai-bain.*

Reportajen: Jacinta Sequeira/Blandina Mauno
Editor: Ekipa STL

LEAVE A REPLY

Please enter your comment!
Please enter your name here