Prevene Konflitus Kalan, KPMD Asegura Seguransa

Komadante PNTL, Munisipiu Dili (KPMD), Superentendente Xefe Polisia, Henrique da Costa. (Foto: Media PNTL)

DILI, STLNEWS.co – Prevene komflitu iha tempu kalan Komandu Polisia Nasional Timor-Leste (PNTL) Munisipiu Dili, halo opersaun iha tempu kalan hodi asegura situasaun seguransa.

Lia hirak nee hatoo husi Komadante PNTL, Munisipiu Dili (KPMD), Superentendente Xefe Polisia, Henrique da Costa ba jornalista sira iha nia knar fatin Komando Polisia Munisipiu Dili, Kinta (3/12/2020).

Tuir Henrique katak, Komando Polisia Munisipiu Dili iha preparasaun ba prevensaun konflitu, halao kedas ona husi Fulan Novembru tanba husi dia 3 de Novembru 2020, iha ona despaisu ida ba komadante esquadra polisia sira.

Tanba nee, husi KPMD mos hetan apoiu husi Unidade Polisia Maritima ekipa ida, Unidade Polisia Fronteria ekipa ida, Quartel Jeral PNTL rasik ekipa ida hamutuk Komando Munisipiu Dili ekipa ida. Hodi reforsa ba Esquadra Polisia iha Kapital Dili liuliu iha tempu kalan. Atu nunee, halo prevensaun ba movimentu iha tempu kalan.

Operasaun nee konsentra liu ba tempu kalan tanba tuir analiza neebe iha. Krime neebe mosu iha Kapital Dili, maioria mosu iha tempu kalan. Tan nee polisia nian dever halo asegura seguransa nee duni hasae volume servisu iha tempu kalan nian para ba iha prevensaun.

Aleinde realiza patrolhamentu kalan, Komandu Polisia Munisipiu Dili mos, iha planu halo operasaun ba fuguetes. Tanba nee, iha loron hirak liu ba konsege kaptura suspeitu ida faan fuguete, nian prosesu lao ona. Agora nafatin halo operasaun bazeia ba despaisu neebe foo sai husi Komando Jeral PNTL nian sei implementa halo opersaun kona ba fuguetes nian.

Kona ba opersaun neebe prepara espesifiku ba selebrasaun Natal ho tinan foun 2021 seidauk hasai. Maibe opersaun neebe agora dadun halo nee ba prevensaun deit para nunee laos deit mosu problema foin ba atende maibe prevene antes.

“Ita boot sira haree lorloron pasa revista laos deit husi parte Polisia Tranzitu deit. Maibe husi Esquadra sira mos involve pasa revista importante. Husi check point nee primeiru kona-ba sasan kroat, segundu kona-ba dokumentus, haree mos kona-ba programa balu neebe dalaruma iha intensaun hodi halo krime seluk ruma,” katak Henrique.*

Reportajen: Maria Tavares
Editor: Ekipa STL

LEAVE A REPLY

Please enter your comment!
Please enter your name here