Roo Nakroma Tula Pasajeirus Normal

Dadaun nee Roo Berlin Nakroma, hahu tula pasajeirus ba Oecusse no Atauro lao normal. Maibe sei nafatin kontrola movimentu, tuir protokolu Covid-19. (Dok: STL)

DILI, STLNEWS.co – Dadaun nee Roo Berlin Nakroma, hahu tula pasajeirus ba Oecusse no Atauro lao normal. Maibe sei nafatin kontrola movimentu, tuir protokolu Covid-19.

Tuir Prezidente Konsellu Administrasaun Portu Dili (APORTIL), Flavio Cardoso Neves dehan, agora dadaun roo berlin nakroma hahu tula pasajeirus lao normal hanesan bai-bain,maibe bainhira implementa EE iha faze primeiru no tuir mai nee, limiti tula pasajeirus,tanba kumpri regras distasiamentu sosial,maibe agora nee tula pasajeirus viazem ba Oecusse no Atauro lao hanesan bai-bain.

“Hau hanoin agora dadaun ita tula pasajeirus Dili, Oecusse no Atauro normal tiha ona,importante mak ita kontrola movimentu distansia ninia,hau hanoin iha nee ita servisu hamutuk ho parte saude nian,ema tun no sae tenke sae nafatin,ho nunee bele kumpri nafatin protokolu saude nian, hau hanoin ita tula kuantidade ema nee ba normal, hanesan trezentus ou trezentus e tal, tanba roo rua nee kada loron sira nian operasaun lao normal ona,tanba nee ita haree ninia movimentu ema nee hahu iha fulan Setembru no Outubru nee lao normal hela deit,tanba nee ita servisu hamutuk ho saude,para bele kontrolu ema sira sae nee,depois ita fo avizu balun uja maskra,importante mak ema sira sae nee tenke leno hotu,” dehan Flavio ba STL iha nia knar fatin Portu Dili Tersa (20/10/2020).

Prezidente APORTIL nee,akresenta,uluk bainhira EE primeiru, movimentu makas,no roo para kuaze fulan ida,segundu oinsa mak roo bele halo garante mos tula sasan nesesidade baziku, nomos ita tula ema nain lima nolu deit, maibe husi numeru ida nee sae tan ba too iha sentu sinquenta, maibe agora normal ona ba ninia kapasidade neebe mak iha.

“Hau hanoin orariu ba operasaun roo rua nee mak hanesan,nakroma ba Oecusse iha loron segunda no kinta,sucses nee ba iha loron tersa no sesta,purtantu roo rua nee semana ida sira ba dala hat,depois ba Atauro dala rua,neebe roo rua nee,semana ida ba Oecusse dala rua-rua hanesan, ba Atauro dala ida,” dehan nia.

Nia sublina, durante nee tuir ninia observasaun katak,pasajeirus sira hahu sae roo nakroma lao normal ona, maibe nafatin kumpri regras ou protokolu husi saude ninia, atu nunee ita bele kontrola ema sira nee.

Iha sorin seluk, Lourdes da Cunha hanesan pasajeirus dehan, atu ba Oecusse ka Atauro, tiket nee tenke sosa sedu. Tanba bainhira laiha tiket ema sei laharuka tama, agora pasajeirus sira uluk nee ladun, agora besik finadu ona ema hahu fila ba ida-idak nian Munisipiu, tanba uluk nee pasajeirus sae roo la hanesan agora nee ema barak.

“Ami atu halo viazem tenke sosa ami nian tiket, tanba ita hatene katak,besik atu tama ba finadu nee ema barak mak sei ba,ita hatene katak, semana oin tan finadu ona,nee pasajeirus barak mak sei halo viazem ba Oecusse,” tenik nia.*

Reportajen: Jacinta Sequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here