Suku Motael Kategoria Inundasaun Kmaan

Foto: Espesial

DILI, STLNEWS.co – Suku Motael, Postu Administrativu Vera Cruz, Munisipiu Dili, tama kategoria inundasaun kmaan, tanba komunidade lahetan grave.

Lia hirak nee hatoo husi Xefe Suku Motael, Luis Antonio Candido Gusmão, ba STL iha knaar fatin Motael, Kuarta (07/04/2021).

“Ami tama kategoria tipe inundasaun neebe kmaan total maioria familia 1.400 resin afetadu ba sasan neebe hetan estragus mak hanesan aihan, kulisaun, inklui sasan sira seluk, tanba bee tama uma laran, maibe komunidade grave laiha,” dehan Luis.

Nia haktuir, foin dadaun akontese inundasaun iha Domingu nee liu-liu iha Aldeia Lirio, tun direita haree bee sae atu besik metru 1. Hanesan lideransa komunitaria foti alternativu lao no buka fatin atu evakua komunidade sira. Komunidade balun evakua duni ba familia sira atu nunee sira bele deskansa, ida rua mak ba too iha Igreja Motael, maibe udan para no bee komesa tun fila ba sira nia fatin.

Luis dehan, tuir formatu Sekretariu Estadu Protesaun Sivil (SEPS), tipe dezastre nee iha formatu oin rua, grave no kmaan, neebe suku Motael tama klase kmaan.

“Ita bele dehan katak presiza atu apoiu komunidade sira liu-liu ba aihan, relasiona serka sanitaria no tama inundasaun susar tebes ba sira, nunee presiza apoiu tanba komunidade halerik,” tenik Luis.

Iha fatin hanesan, komunidade Elizio Freitas Pereira hatete, udan boot iha loron Sabadu too Domingu neebe akontese iha fatin nee bee tama, maibe la estraga sasan no uma laran mak tahu deit.

Reportajen: Joaninha Belo
Editor: Ekipa STL

LEAVE A REPLY

Please enter your comment!
Please enter your name here