Aeroportu Baucau, Lere Dezafia Taur

Xefe Estadu Maior Jeneral FALINTIL-Forsa Defeza Timor—Leste (F-FDTL), Major Jeneral Lere Anan Timur. (Foto: Media F-FDTL)

BAUCAU, STLNEWS.co – Xefe Estadu Maior Jeneral FALINTIL- Forsa Defeza Timor-Leste (F-FDTL), Major Jeneral, Lere Anan Timor dezafia Primeiru Ministru, Taur Matan Ruak atu aselera lalais projetu konstrusaun Aeroportu Internasional Baucau.

Tuir Lere fundu ba projetu konstrusaun aeroportu nee ho total orsamentu miliaun U$10 nee hetan aprovasaun husi Governu Estadus Unidus Amerika (EUA). Amerika rasik aseita pedidu konstrusaun nee, hafoin nia parte ho insiativa halao reuniaun ho Komandante Indo-Pasifiku Estadus Unidus Amerika (EUA), Almirante Phill Davidson iha 2018 liu ba, hodi husu kooperasaun tekniku militar EUA halo konstrusaun ba areoportu nee.

“Hau sei koalia ho governu hodi aselera projetu nee,” dehan Lere iha nia deskursu durante enseramentu ezersisiu “Harii Hamutuk” iha edifisiu Komandu Komponente Terrenu F-FDTL, Lanud-Baucau, Segunda (19/10/2020).
Lere husu Governu Amerika atu labele duvida ho implementasaun projetu nee, tanba nia parte koalia ona ho Xefe Estadu, Fransisco Guterres Lú-Olo no Primeiru Ministru Taur Matan Ruak hodi haree implementasaun projetu nee tuir kooperasaun tekniku militar nian.

“Dala ruma Amerika laran rua-rua haree projetu nee halo ka la halo? Hau dehan ba embaixadora, ita militar nee ita lao ba oin nafatin bazeia ba ita nia kooperasaun tekniku militar, dala ruma politiku sira la kumprende saida maka kooperasaun militar fo ba ita. Planu Aeroportu Baucau, hau rasik maka koalia ho Komandante Indo-Pasifiku EUA, Almirante Phill Davidson, bainhira ami rua halao reuniaun hamutuk,” afirma Lere.

Komandante F-FDTL espera governu Timor-Leste sei foti desizaun ida pozitivu liu husi reuniaun Konsellu Ministru atu aprova implementasaun projetu nee. Tanba Governu Amerika prontu oferese aviaun kiik ba komandu F-FDTL. “Hau entrega ba governu maka sei deside, tanba Aeroportu nee ba Timor-Leste tomak, tanba iha Timor-Leste iha Aeroportu, Oe-Cusse, Dili no Suai kiik, labele simu aviaun boot, tanba nee harii Aeroportu Baucau atu bele simu aviaun boot,” tenik Lere.

Iha fatin hanesan, Emabaixadora Estadus Unidus Amerika ba Timor-Leste, Kathleen Fitzpatrick dehan, Governu Amerika iha nafatin kometimentu hodi implementa projetu nee. “Ami prontu nafatin atu halo konstrusaun, maibé ami hein desizaun tomak hosi Governu Timor-Leste, ami apoiu deit tekniku engeñariu sira hodi apoiu F-FDTL,” dehan Embaixadora nee.

Projetu nee sei hahu hosi prosesu kontrusaun moru, hadia avian nian para fatin, inklui konstrusaun no apoiu ekipamentu ba ekipa bombeiru nian no apoia aviaun ida ba Komandu F-FDTL.
Embaixadora Kathleen dehan, bainhira konstrusaun ne’e hahu sei envolve ekipa engeñária hosi Forsa Amerika inklui Forsa engeñaria F-FDTL nian.

Apresia “Harii Hamutuk”

Komandu FALINTIL Forsa Defeza Timor-Leste (F-FDTL) hatoo agradese ba programa setimu ezersisiu “Hari Hamutuk” 2020 neebe halo servisu makas tebes hodi ajuda halo konstrusaun ba ekipamentu no dezenvolvimentu infraestrutura F-FDTL nian.

Ezersisiu “Harii Hamutuk” neebe hahu abertura iha loron 30 Setembru no ensera iha Segunda (19/10/2020) iha edifisiu Komandu Komponente Terrestre Baucau nee envolve forsa nasaun tolu hanesan Komandu F-FDTL, Forsa Defeza Austrália no Forsa Defeza Estadu Unidus Amerika (EUA).

Ezersisiu nee lao durante fulan ida, forsa hosi nasaun tolu nee servisu hamutuk ajuda F-FDTL nia ekipa mediku kompleta ona sira nia formasaun ba primeiru sukoru, resusitasaun no tau matan ba tratamentu ba kanek nian.

Hatutan pajina 2

LEAVE A REPLY

Please enter your comment!
Please enter your name here