VIKEKE, STLNEWS.co – Autoriedade Nasional Petroleu liu husi Diretor Interinu Aprovizionamentu no Konteudu Lokal ba Petroleo no Minerais, Rosentino Amado Hei hateten, saida mak Kompanhia Carnavon Petroleo, LTD oferese atraves husi ANPM, mezmu kiik maibe ida nee mak husi ami nia parte bele kontribui.
“Husi ami nia parte hanesan ami hatoo tiha ona katak labele haree ba montante, saida mak ita boot sira husu, ida nee mak ita tenta atu responde, espera buat kiik oan ida neebe mak husi ami nia parte bele kontribui, bele suporta liu tan buat neebe mak ita boot sira halo tiha ona,” hatete Diretor Interinu Aprovesionamentu no Konteudu Lokal ba Petroleo no Minerais Rosentino Amado Hei ba jornalista sira iha edefisiu Postu Administrativu Uatolari,Vikeke, Kuarta (12/04/2023).
Nia hatete, buat ida neebe hakarak hatoo iha nee mak hanesan iha fulan hirak liu ba, liu husi senhor administrador, maski ohin la hamutuk iha nee, mais diskusaun nee hahu tiha ona ho senhor administrador inklui Administrador Interinu, oinsa bele identifika grupu, too ikus kbiit neebe ANPM fo bele apoiu ba grupu 4 nee.
“Ami mos hatene katak grupu barak iha Uatolari, neebe ho inisativa rasik halao buat ruma ona, maibe seidauk hetan oportunidade hanesan ita boot sira,” katak nia.
Diretor ANPM haktuir, antes nee identifika ona grupu sira neebe mak daudaun nee marka prezensa iha nee, laos foin mak atu halo maibe balun halo tiha ona.
“Ita hamutuk iha grupu la fasil tanba iha dezafiu, maibe dezafiu ida nee mak hau hanoin tenki ultrapasa,” katak nia.
Iha fatin hanesan, Administrador Interinu Postu Uatolari, Thomas da Silva husu ba grupu sira neebe simu apoiu fundus husi ANPM nee.
“Grupu sira neebe ohin simu apoiu fundus nee, hau husu mak imi nia vontade no imi nia responsabilidade atu uza ho didiak fundus nee,” dehan nia.
Nia haktuir, sasan neebe sira simu nee laos oportunidade ba sira, simu tiha apoiu nee tenki jere tuir nia mata dalan para bele fo moris ba sira iha aban bainrua nia.
Bainhira sira jere halo didiak sei la taka dalan ba foin sae sira seluk hodi haree tuir para depois sira harii grupu hodi tama mos iha neebe, para oinsa bele fo moris sira iha futuru,” katak Administrador Interinu nee.
Entretantu, benefisiador neebe reprezentante grupu holtikultura, Anibal do Rosario Amaral hanesan mos kodernador grupu Familia Dentri informa, “Hau agradese tebes ba apoiu husi ANPM neebe tulun ona ami, para ami nia atividade Hortikultura neebe ami kria bele lao ho diak liu tan,” dehan Anibal.
Nia haktuir, grupu familia dentri nia atividade mak kuda modo, hakiak animal inklui hakiak ikan, montante osan neebe kada simu bazeia ba proposta neebe kada grupu hatama.
“Atividade grupu dentri nia mak hakiak ikan, fahi, manu ho kuda modo, orsamentu neebe grupu sira simu nee haree tuir proposta neebe, kada grupu hatama,” katak kordenador nee.
Montante osan neebe grupu dentri simu hamutuk US$ 4 mill resin no total orsmentu neebe kompanhia Carnavon Petroleu oferese atraves husi ANPM ho total US$ 30 mill Ital.
Osan refere antes entrega ba kada grupu holtikultura, kada grupu sei asina akordu hafoin entrega ba grupu sira.
(cri)
