DILI, STLNEWS.co – Postu Administrativu Uatolari simu apoiu laptop 5 husi Autoriedade Nasional Petroleu no Minarais (ANPM), hafoin simu proposta neebe hatama husi Administrador Postu Uatalari.
“Ohin ANPM mai iha Postu Uatolari, hafoin ami simu proposta neebe mai husi Administrador Postu hodi oferese mos laptop 5, atu nunee bele fo asistensia ba iha administrasaun estatal Postu Uatolari ninian,” lia hirak nee hatoo husi Diretor ba Dezenvolvimentu no Produsaun ANPM, Fernando da Silva ba jornalista sira iha Postu Administrativu Uatolari, Vikeke, Kuarta nee (12/4/2023).
Nia afirma, hein katak ho asistensia neebe ANPM fo bele mos ajuda grupu sira neebe simu suporta sira nee, atu bele melhora liu tan sira nia atividade.
“Hodi asegura sustentabilidade ba sira nia projeitu nee rasik, liu-liu sustentabilidade ekonomia, nunee mos ba Administrativu Postu Uatolari liu husi asistensia neebe ANPM fo,” hatete nia.
Iha fatin hanesan, reprezentante Administrador Postu Uatalari, Thomas Soares da Silva dehan, agradese ba apoiu neebe oferese husi ANPM, mezmu laos foun, maibe husu para bainhira loke nia kondisaun diak hela para bele uza, ida nee mak importante.
“Ba ekipa ANPM ninia vontade neebe oferese hela laptop 5 mai ami, lori administrador nia naran, ami agradese, ami la sura mak dehan fo, maibe ami sura mak karik loke bele uza, ida nee mak ami husu, ami la husu buat ida foun,” hatete Administrador Interinu nee.
Nia afirma, espera ho laptop 5 neebe oferese husi ANPM bele fasilita ona servisu administrasaun iha Postu Uatalari, mezmu laos foun maibe simu ho kontenti.
Laptop neebe ANPM oferese nee entrega direita husi Diretor Interinu Aprovizionamentu no Konteudu Lokal ba Petroleo no Minerais, Rosentino Amado Hei ba Administrador Interinu Thomas Soares da Silva neebe akompanha husi Diretor ba Dezenvolvimentu no Produsaun ANPM Fernando da Silva inklui Xefi Suku Afaloikai, Matahoi no Uaitame inklui benefisiador Grupu Holtikultura.
(cri)
