Antonio: Relata Dadus Baucau Ba PR

Prezidente Autoridade Munisípiu Baucau relata dadus Baucau nia ba Prezidente Republika (PR) Francisco Guterres Lú Olo kona-ba dezenvolvimentu iha munisípiu Baucau. (Foto: Media PR)

BAUCAU, STLNEWS.co – Prezidente Autoridade Munisípiu Baucau relata dadus Baucau nia ba Prezidente Republika (PR) Francisco Guterres Lú Olo kona-ba dezenvolvimentu iha munisípiu Baucau.

Tuir Prezidente Autoridade Munisípiu Baucau, Antonio Augusto Guterres hatoo dadus nee ba PR liu husi aprezentasaun dialogu iha munisipiu Baucau, Kinta (17/12/2020).

“Administrativamente Baucau iha postu administrativu 6, suku 59, 281 neebe ho total populasaun tuir fixa familia neebe rokolla iha tinan ida nee, 184.489 neebe kompostu husi mane 93.279 no feto 91.220 ho total uma-ka’in 34.671,” dehan PAM

Prezidente nee mos dehan, eskola sira neebe estabelese iha Munisípiu Baucau hamutuk 229.

“Total eskola neebe eziste iha Munisípiu Baucau, hahu husi pre-eskolar too Sekundariu jeral no tekniku vokasional hamutuk 229,” dehan PAM.

Alende nee, nia dehan, postu saude neebe estabelese ona iha munisípiu Baucau hamutuk 28, sentru saude 9 ho nia atividade sira neebe halao radikalmente ba programa siska iha 60.

PAM Baucau mos dehan, irigasaun neebe tekniku liu iha Baucau hamutuk rua, hanesan irigasaun Aitula fornese bee ba natar hektar 347, neebe koletiva ona 307 no nia benefisiariu iha uma-kain 160. Alende nee irigasaun Vemasse fornese bee ba natar hektar 415 neebe halo ona koletiva ba 280 kektare no nia benefisiariu haumtuk 213 uma-kain.

“Potensia natar iha munisípiu Baucau 14.422, kompostu husi postu Baguia iha 643 hektares, Baucau vila 5.184, Laga 2.264, Kelikai 902, Vemase 2.422 no postu Venilale 2.293 hektares,” dehan nia.

Alende nee, potensia toos iha Baucau iha 16.000, iha postu Baguia iha 3.347 hektares, Baucau vila 3.016, Laga 2.372, Kelikai 3.016, Vemase 1.325 no postu Venilale 2.902 hektares.

Antonio afirma, estrada rural, povu diretamente asesu ho signifikante ba sentru populasaun iha area rural ligasaun husi nivel suku neebe konsege ona reabilitasaun hamutuk 165.8 kilometru reabilitasaun ka pursentu 37%.

Sistema fornesimentu bee-moos ho numeru uma-ka’in neebe asesu 5.698, depois servisu neebe seidauk deskonsentra mai munisípiu Baucau mak kona-ba lina eletrisidade, maibe iha dadus neebe atualiza administrasaun munisípiu neebe konsege rekolla katak 71% mak komunidade atinje, entaun husi 281 aldeia nee iha aldei 226 mak asesuona, maibe aldeia neebe seidauk asesu hela deit 55 aldeia.

Munisípiu Baucau mos aprezenta planu estratejiku munisipal husi tinan 2019 too 2023, depois husi 2023 too 2030.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here