LAUTEM, STLNEWS.co – Bis diresaun Dili ho Lospalos oras nee sei kontinua selu ho osan US$ 10 kada ema ida, maski Direção Nacional de Transportes Terrestres (DNTT) fo avizu ona tenki selu hanesan presu baibain.
“Bis husi Dili mai Lospalos ita sei kontinua selu US$ 10 kada ema ida, tanba nee husu DNTT tenki kontrola,” hatete Pasajerius Bis Lospalos, Carlito do Santos ba STL iha merkadu Lautem, Tersa nee (04/04/2023).
Nia dehan, pasajeirus Dili mai Lospalos senti tristi, tanba bis sei kontinua selu US$ 10, maski mina bensin no gazoel presu tun, maibe sira husu tenki selu US$ 10 laos US$ 8.
Nia hatete, uluk DNTT koalia ona katak tenki selu tuir buat neebe governu fo sai ona iha TV no jornal. Tanba uluk husi Dili ba Lospalos selu US$ 8 laos sae ba US$ 10.
Iha fatin hanesan, pasajeirus Paulina da Costa dehan, bis sira kontinua selu US$ 10, ida nee labele, tanba uluk mina folin sae selu US$ 10, agora sira nafatin selu US$ 10, seidauk hatun normal hanesan ema ida US$ 8.
“Bis hotu-hotu seidauk hatun presu, ohin hau husi Dili mai tun iha Lospalos kota nafatin US$ 10, maski ita nia governu fo sai ona transporte publiku hanesan Bis Lospalos no Maliana, Suai, Ainaro, Aileu, no sira seluk tenki selu tuir montante neebe fo sai ona,” nia informa.
Nia deklara, governu liu husi DNTT tenki kontrola makaas ba bis sira neebe halo muvimentu foho ba kapital Dili, tanba komunidade balun hakarak lori produtu lokal ba Dili sira labele ba tanba bis sei selu ho US$ 10.
Observasaun STL nia iha terenu, Bis Lospalos ezije nafatin pasajeirus sira tenki selu US$ 10, se lori produtu lokal selu tuir karon, karon ida US$ 5. Uluk kombustivel sae kada ema ida US$ 7, maibe agora Bis Baukau nia pasajeirus kada ema ida selu US$ 4.
(jac)
