BNCTL Realiza Atividades Halai Bisikleta

Relasiona ho inagurasaun Banku Nasional Comersiu Timor Leste (BNCTL) foun RAEAO, no komemorasaun 28 Novembru, BNCTL realiza programa ho naran fun bike, bele anima komunidade sira liu husi atividades halai bisikleta, hamutuk ho ekipa autoridade Prezidente RAEAO no komunidade sira. (Foto: STL/Jacinta Sequeira)

OECUSSE, STLNEWS.co – Relasiona ho inagurasaun Banku Nasional Comersiu Timor Leste (BNCTL) foun RAEAO, no komemorasaun 28 Novembru, BNCTL realiza programa ho naran fun bike, bele anima komunidade sira liu husi atividades halai bisikleta, hamutuk ho ekipa autoridade Prezidente RAEAO no komunidade sira.

Atividades halai bisikleta nee rasik hahu iha kampu palaban Oecusse, too edifisiu foun BNCTL, atividades nee rasik, abertura husi Prezidente Konsellu Administrasaun, Antonio Vitor, akompania husi Prezidente Autoridade RAEAO, Arsenio Bano.

“Hau hanoin atividades ohin nee hola parte ba atu selebra no festeza hamutuk loron inagurasaun edifisiu foun BNCTL foun ambeno iha Pante Macasar RAEAO nian, maibe aproveita mos iha ambitu ida ba 28 Novembru, ita atu selebra ita nian loron boot nee, halao atividades hanesan ohin ita hanaran fun bike, ita haree malu hanesan familia mai haksolok hamutuk, maibe ita mos ho bisikleta nee ita bele promove atividades fiziku, liu-liu ba labarik sira,” dehan Prezidente Konsellu Administrasaun, Antonio Vitor ba jornalista iha kampu palaban RAEAO Kinta (19/11/2020).

Nia sublina, atividades nee ohin hahu husi kampu palaban, tama too iha hospital oin no edifisiu BNCTL nia oin, too iha aeroportu bele fila-fali mai, maibe atividades ida nee bele halao hamutuk, hodi haksolok no festeza hamutuk ho maluk sira, relasiona ho loron importante rua neebe ohin temi tiha ona.

Nunee mos, Aqing Uang, hanesan Sekretariu Jeral Mushila FC hatete, husu atu lori bisikleta tenke halai ho velosidade neebe kiik, labele halai makas, depois labarik sira karik sai husi nee ba too iha edifisiu BNCTL fila mai tama hein deit ona iha kampu palaban, tanba too iha fatin ida nee sei fahe premiu ba maluk sira.

“Husu ita hotu neebe mak sai husi fatin ida nee, presiza halai ho velosidade neebe kiik, no labele halai ho velosidade neebe boot, tanba ita halao atividades ida nee hamutuk ho ita nian oan kiik sira, ho ida nee, hau husu atu ita hotu tenke halai neneik, no labarik sira neebe lori bisikleta sai husi nee too edifisiu BNCTL, fila mai bele tama no hein deit ona iha nee,” nia dehan.

Tuir observasaun STL iha terenu Kinta ohin (19/11/2020), iha kampu palaban Oecusse, antes halao atividades halai bisikleta nee, hahu uluk ho hino nasional, no atividades refere akompania husi membru polisia tranzitu RAEAO ninia, hafoin halao atividades halai bisikleta, dadarifa hodi fahe premiu osan no bisikleta.*

Reportajen: Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here