Cidalia: Estadu Presiza Fo Atensaun Ba Promosaun Igualidade Jeneru

Espoza PR hatete estadu no governu Timor Leste presiza fo atensaun makaas ba programa Protesaun Promosaun Igualidade Jeneru. (Foto: STL/Emerenciana Pinto)

AILEU, STLNEWS.co – Espoza PR hatete estadu no governu Timor Leste presiza fo atensaun makaas ba programa Protesaun Promosaun Igualidade Jeneru.

Kestaun nee hatoo husi espoza PR Cidalia Mouzinho Nobre Lopes Guterres liu husi diskursu, bainhira komemora loron Internasional Feto Rural iha Postu Administrativu Laura, Kinta (15/10/2020).

“Maluk sira hotu, estadu presiza fo atensaun makaas liu tan ba programa protesaun no promosaun igualdade jeneru espesialmente atu hakbiit labarik, barak feto no feto prinsipalmente iha area rural atu goza sira nia direitu, neebe mak konsagra iha Konstituisaun RDTL: artigu 16,17, 18 no instrumentu internasional sira hanesan konvensaun Nasaun Unidas ba direitu labarik no Konvensaun Atu Halakon Diskriminasaun Hotu- Hotu Hasoru Feto (CEDAW).” hatete espoza PR.

Espoza PR dehan Instrumentu Internasional “CEDAW” nudar abut ba instrumentu legais sira seluk determina katak, estadu iha obrigasaun hotu atu respeita no promove igualidade iha lei no politika, iha obrigasaun atu proteze parte hotu husi formas diskriminasaun diretu no indiretu, no iha obrigasaun atu asegura igualidade no elamina diskriminasaun jeneru iha area publika, no domestika hodi bele kontribui ba desenvolvimentu sustentavel.

“Hau, no karik ita hotu rekonese katak feto sira mak nudar forsa traballu iha area agrikultura, komersiu no servisu informal seluk tan. Tanba nee haktuir ba enkuadramentu legal nasional no internasional oin-oin, hodi enkoraja no motiva kuantidade no kualidade produsaun feto sira nian. Hau hatene katak iha oitavu (VIII) governu konstitusional inisia no aprova ona dekretu lei adosaun medida apoiu familiar, mediante atribusaun “Cesta Basica” nuudar medida restrisaun iha ambitu luta hasoru pandemia” katak espoza.

Inan nasaun nee hatutan iha obrigasaun atu proteze iha parte hotu husi formasaun diskriminasaun oin oin hasoru feto no labarik, no estadu mos iha obrigasaun atu proteze igualidade jeneru.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here