DILI, STLNEWS.co – Ekipa IGEADI husi nasional neebe servisu hamutuk ho Ministeriu Obras Publika (MOP), ohin tun ona hodi normaliza kondisaun estrada iha Zulo Knua, Suku Zulo, Postu Administrativu Zumalai, Munisipiu Kovalima.
Lia hirak nee hatoo husi Xefi Suku Zulo, Postu Administrativu Zumalai, Munisipiu Kovalima, Joao Lopes de Carvalho ba STL liu husi telefone, Domingu nee (16/07/2023).
“Too ohin loron besik semana rua ona ita nian komunidade iha Zulo Knua la asesu bee moos no eletrisidade, tanba kauza husi udan boot neebe akontese iha loron 5 fulan nee, rezulta rai halai no estragus komunidade sira nian uma, maibe ohin ekipa ida husi nasional mai para atu bele normaliza ita nia estrada, nunee ita nian vitima sira tula material neebe simu ona ba iha fatin foun neebe atu konstrui sira nian uma,” nia afirma.
Joao dehan, daudaun nee nia hamutuk ho ekipa inklui komunidade sira iha Zulo Knua, ohin atu normaliza estrada neebe hetan estragus husi rai halai tanba udan boot, maibe komunidade sira sei konsumu deit bee posu, tanba bee torneira la sai, ohin komunidade balun atu ba Lepo para kesi pipa neebe dada bee moos mai Zulo Knua neebe hetan estragus.
“Dala ruma ita nian komunidade sira naran uza bee neebe mak iha, tanba ita nian bee posu balun hetan estragus husi rai halai, bainhira ahi la lakan, ita nian komunidade sira kalan tenki sunu lilin, balun fulan naroman tur deit iha liur,” nia dehan.
(jac)
