LIKISA, STLNEWS.co – Enkaregadu Negosiu Embaixada Estadus Unidus Amerika (EUA) iha Timor Leste, Tom Daley no Ministeriu Edukasaun Juventude no Desportu (MEJD), reprezenta husi Diretor Jeral Planu Politika Inkluzaun, Raimundo Jose Neto, inagura eskola sala 2 neebe konstrui husi Naval EUA iha Suku Vaviquina, Postu Administrativu Maubara Vila, Munisipiu Likisa.
Nia dehan, loke sala Pre-Eskolar foun 2 iha Maubara neebe EUA nia Forsa Naval Seabees mak harii, fasilidade foun nee sei benefisia estudante 60 resin no harii ho orsamentu liu US$ 220,000. Forsa Naval EUA hamutuk 25 harii eskola iha fulan tolu liu ba, ho apoiu husi Enjeneiru FALINTIL – Forsa Defeza Timor Leste (F-FDTL) nain 6, projetu hamutuk 104 neebe konstrui ka reabilta ona husi Seabees dezde tinan 2009.
“La iha sinal seluk neebe diak liu konaba ami nia kompromisu no ba amizade neebe dura nafatin ho Timor Leste loke eskola nee,” Tom Daley liu husi nia diskursu iha Eskola Pre-Eslolar Maubara, Segunda nee (09/05/2022).
Nia haktuir, Forsa Naval EUA Seabees tau sira nia fuan no moris iha projetu nee durante oras barak nia laran, no uza padraun seguransa neebe diak hodi ajuda Timor Leste harii futuru ida neebe diak liu ba lider jerasaun foun sira tuir mai.
Nia relata, Forsa Naval EUA Seabees harii no reabilita ona klinika no eskola liu 100 iha Timor Leste, hodi ajuda Timor harii futuru ida diak liu ba nia povu, ho espiritu amizade nee, Seabees kompleta ona projetu sira neebe ho valor liu millaun US$ 50 durante tinan 13 nia laran. Tanba sira nia prezensa iha Timor Leste dezde tinan 2009, grupu militar Amerikanu sira nia enjeneiru sira kada fulan 6, iha tempu badak Seabees sei hahu konstrusaun ba sala eskola Primiria 3 iha Baucau ho valor kuaze US$ 290,000.
Iha fatin hanesan, Diretor Jeral Planu Politika Inkluzaun, Raimundo Jose Neto hatete, Governu EUA dezde uluk kedas iha setor area edukaaaun Governu EUA apoiu lubuk ida, maibe ikus nee apoiu infraestrutura laos iha Eskola Pre-Eskolar Maubara deit, maibe eskola sira seluk mos.
“Hau agredese ba Governu EUA liu husi Embaixada EUA iha Timor Leste,” dehan nia.
(joa)
