DILI, STLNEWS.co – Relasiona ho estrada neebe aat iha Suku Eraulu, Postu Administrativu Lete Foho, Munisipiu Ermera, too oras nee daudaun seidauk hadia.
“Estrada too agora seidauk hadia, ami hein deit kompanhia neebe mak mai hadia, ami prontu kopera,” dehan Xefi Suku Eraulu Domingos Madeira ba STL iha Ermera, Sesta nee (21/04/2023).
Xefi suku sublinha, se la hadia lalais estrada nee, mak tempu udan bele difikulta mos movimentu sira neebe lao ain, bainhira iha udan boot.
Tanba udan boot, mota tun, ema labele halo movimentu ba mai.
Domingos husu atu governu presiza haree mos ba problema nee, tanba komunidade barak mak labele movimentu ba mai, kauza husi estrada aat nee.
Iha fatin ketak, Komunidade Ermera Tomas dos Santos dehan, tristi ho kondisaun estrada neebe aat.
“Hanesan komunidade la husu buat seluk, maibe husu deit governu atu hadia lalais estrada neebe aat,” dehan nia.
Hanesan komunidade husu atu governu bele iha planu diak, no se bele hadia deit ponte ida atu estrada neebe hadia sai kualidade, hodi iha futuru labele aat tan.
Tuir observasaun STL nian, dalan iha Manhoho leta oras nee daudaun naksobu hela, maibe seidauk hadia. No iha motor balu halo movimentu ba mai, maibe too iha dala nee sira tenki para hodi dudu deit.
(ter)
