BAUCAU, STLNEWS.co – Edukasaun primeiru ba oan sira mai husi familia, tanba nee familia forte sai fundamentu ba konstrusaun estadu.
Kestaun nee hato’o husi Amu Parokia Venilale, Padre Carlos Fernandes ba jornalista iha Kapela Badomori, pertense ba Parokia Venilale, Domingu nee (02/01/2022).
Nia hatete, familia mak sai fundamentu ba konstrusaun estadu, familia nee hun moris nian, ema ida la monu husi lalehan mai, maibe moris husi familia ida, tanba nee familia mak sai ezemplu diak ba oan sira.
“Tanba familia forte sai fundamentu ba konstrusaun estadu ida neebe laos dehan feto forte nasaun forte, maibe familia forte nasaun forte, feen ida laen ida hadomi malu tau matan labarik sira idak – idak halao ninia knaar didiak, eduka oan didiak pasti familia forte nasaun forte, tanba feto mesak la halo buat ida,” katak nia.
Padre mos hato’o mensajen ba familia sira hotu atu moris loloos tuir Maromak nia hanorin, hadomi malu, respeita malu, no eduka oan sira ho domin nunee oan sira lao tuir saida mak inan aman hanorin ona.
(eme)
