GAAC Hamutuk Ho MG Komemora Loron Internasional Feto Rural

Gabinete de Apoiu a Atividade Conjuge (GAAC) do Prezidente Republika hamutuk ho parseru no membru governu komemora loron internasional Feto Rural iha munisipiu Aileu. (Foto: STL/Emerenciana Pinto)

AILEU, STLNEWS.co – Gabinete de Apoiu a Atividade Conjuge (GAAC) do Prezidente Republika hamutuk ho parseru no membru governu komemora loron internasional Feto Rural iha munisipiu Aileu.

Liu husi diskursu, espoza PR Cidalia Mouzinho Nobre Lopes Guterres iha postu administrativu Laura, Kinta (15/10/2020) hatete tema global ba tinan 2020 mak “Haforsa Rezilensia Feto Rural Hasoru Mudansa Klimatika.”

“Tema ida-nee relevante ho kontestu mundo global ohin loron nian, hodi hare konaba knaar importante feto rural sira nian luta hasoru surtu Covid-19 no mudansa Klimatiku.” hatete espoza PR.

Espoza hatutan tema ida nee pertenente duni, iha mundu kontestu ohin loron nian neebe hasoru hela pandemia COVID-19 no mudansa klimatiku husi relatoriu sira, neebe asegura iha media sosial katak durante Covid-19 iha fatin barak iha mundu, feto no labarik barak iha area rural maka sofre liu tanba lahetan asesu ba tratamentu saude adekuadu, aimoruk, bee mos, saneamentu baziku, no menus ba asesu teknolojia atu hadia diak liu tan moris.

“Hau no karik feto maluk sira nia esperensia durante pandemia Covid-19 hatudu katak feto hetan risku boot liu ba Covid-19, tanba bainhira feto isin rua ida ba hetan positivu ba Covid-19 se fo ameasa boot ba nain rua dala ida, ezemplu seluk tan hanesan kampanha fase liman ho bee suli, maibe iha area rural seidauk iha kanalizasaun bee mos, uza maskra maibe laiha rendimentu hodi sosa maskra no hand sanitizer” katak nia.

Foto: STL/Emerenciana Pinto

Iha fatin hanesan Administrador Munisipiu Aileu, João Tilman Do Rego mos lori povu Aileu nia naran hatoo agradese no hatoo bemvindo ba partisipante sira neebe mak hamutuk hodi komemora loron Internasional Feto Rural iha Munisipiu Aileu, postu administrativu Laura.

Administrador dehan feto nia partisipasaun ba iha dezenvolvimentu nee importante tebes, tanba feto mak sai parseru ba mane iha prosesu dezenvolvimentu nasional, tanba nee mak presiza kompleta malu iha kualker atividade.

Partisipante neebe mak partisipa iha komemorasaun loron internasional feto Rural nee mai husi Gabinete de Apoiu a Atividade Conjuge (GAAC) do Prezidente Republika, no membru governu sira, reprezentante povu iha uma fukun parlamentu nasional, PLAN Internasional, Fundasaun Sadia, Hafoti, CNC no komunidade no estudante husi Munisipiu Aileu rasik.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here