Gruta Maria Rainha Da Paz Dacuate Hetan Bensa

Gruta Maria Rainha Da paz neebe mak harii husi sarani sira Dacuate husi suku Afaloicai, Postu Administrativu Uatulari, Munisipiu Viqueque hetan bensaun husi Padre Parokia Darabai. (Foto: STL/Emerenciana Pinto)

UATULARI, STLNEWS.co – Gruta Maria Rainha Da paz neebe mak harii husi sarani sira Dacuate husi suku Afaloicai, Postu Administrativu Uatulari, Munisipiu Viqueque hetan bensaun husi Padre Parokia Darabai.

Iha biban nee Padre Selebrante Petrus Day Meno,SVD hatete Gruta nee harii tanba ho sakrifisiu no domin husi sarani sira mak harii Gruta referee iha Aldeia Dacuate, no Gruta Aldeia nee Primeiru iha Uatulari.

“Hau hanoin Gruta aldeia nia hau hanoin nee Gruta primeiru iha Uatulari, nee Gruta hatudu dalan nunee sarani balun aldeia balun bele halo tuir, depois Gruta nee inan Virgem Maria nia ilas iha neeba ona, imi nia kapela Naedala mos hamriik ona nee buat diak ida katak imi hakarak hametin imi nia fiar ba maromak no hakbesik aan liu tan ba maromak” hatete Padre Bainhira remata bencao Gruta iha Aldeia Dacuate, Segunda (04/01/2021).

Padre Selebrante nee hatutan ohin loron Inan Maria nia ilas hamrik metin iha Aldeia, espera katak loron loron karik ba natar no toos kuandu kolen bele hakbesik aan ba Gruta hodi halo orasaun reza tersu ida ka rua iha neeba, se la reza nee hanesan hiasan deit.

“Ohin loron ita haksolok hamutuk tanba Gruta iha nee iha ona, maibe iha fatin balun bensaun hotu husik tiha, iha fatin balun Gruta halo didiak maibe husik tiha halo fali hanesan bibi luhan ka animal mak tuur iha neeba, maibe uza Gruta nee hodi hametin tan ita nia fiar ba maromak, hakbesik aan liu tan ba maromak, ita reza liu husi inan Virgem Maria atu husu grasa maromak nia liu husi nia tulun ba idak idak nia familia ba komunidade, ba ita nia aldeia neebe oras nee moris ho situasaun neebe mak runggu rangga iha fatin-fatin, reza nunee iha domin no dame iha familia, aldeia no suku ida nee” katak Padre.

Padre Paroko Uatulari nee hatutan Gruta nee Gruta Aldeia Dacuate nia maibe lataka dalan mos ba ema seluk tanba Inan Maria nee ba ema hotu, karik ema seluk mai reza labele bandu katak nee Gruta Dacuate nia deit, maibe loke dalan ba ema hotu atu hakbesik aan liu tan ba maromak.

Nunee mos Gruta iha ona presiza uza ho didiak halibur labarik sira hodi reza tersu no presiza mos reza tersu iha fulan Maiu no Outubru tanba fulan rua nee importante maibe balun lahalo orasun, maibe sarani Naedala sempre lao.

Presiza reza Ave Maria tanba uluk iha Fatima Maria hatudu aan ba Santo No Santa nain tolu neebe Nain Feto Maria hatete sempre reza orasaun maske liafuan Ave Maria hanesan too dala 10 no hodi reza tersu lima, maibe nee lori grasa no milagre mos ba familia, no ema neebe reza ho fuan no laran ba Maria liu husi tersu, nia sei hetan milagre iha nia moris.

Foto: STL/Emerenciana Pinto

Bibi Atan Uma Kreda Katolika nee hatutan bainhira hatoman aan reza iha Gruta liu liu konvida joven sira katak Maromak nee importante iha moris, bainhira reza tersu hamutuk, neneik joven neebe lapartisipa misa bele haruka tuur iha Gruta hodi halo orasaun no misa prosesaun husi Gruta ba kapela.

Padre mos hatoo agradese ba sarani sira liu liu ba Madre Juliana Amaral SSps nia esforsu no domin bele harii Gruta nee iha komunidade nia leet, no agradese mos ba maromak tanba no nia grasa no domin bele haraik domin sarani sira harii Gruta iha komunidade nia leet.

Nia hatutan oras nee ho Covid-19, tanba nee regra hatun labele halibur ema barak tanba nee labele halo misa maibe bensaun Gruta mos ema nain 10 deit laliu ida nee.

Padre hatoo agradese ba sarani sira tanba bensaun Gruta tuir regra neebe iha hamriik ho distansia no padre no madre too iha Gruta oin, sarani hamriik dook deit la besik, laos hanesan uluk, tanba uluk seidauk Covid-19, padre ho madre too sempre hakbesik sempre kaer liman maibe iha bensaun Gruta nee oin seluk.

Iha fatin hanesan sarani Martins Alves mos lori sarani sira nia naran, hatoo agradese ba Padre Paroki Uatulari neebe mak ho laran luak bele ba bensaun Gruta Dacuate.

“Lori sarani Dacuate nia naran hatoo agradese no obrigado ba Padre Parokia neebe mak ho laran luak bele bensaun ona ami nia Gruta, tanba durante nee tenta bebeik padre oinsa mak hodi bensaun no halo misa, maibe padre dehan ho Covid-19, tanba nee labele halibur ema barak no padre mos hatun regra katak misa labele ona tanba bandu husi Amu Bispo no bensaun mos ema laliu nain10, kuandu liu nain 10 Padre sei fila tanba kontra regra entau ami sarani mos tuir bainhira padre no madre too ami la besik no distansia lakaer liman ho padre no Madre, no sarani nain 10 deit mak hamutuk ho Padre hodi bensaun Gruta, sarani seluk hamriik dook” katak nia.

Sarani nee hatutan, inisiativa harii Gruta nee mai husi nia rasik ho Madre Juliana Amaral SSsp, depois halo koordena hamutuk ho sarani sira Dacuate, ikus realiza duni no hetan bensaun husi padre.

Nia hatutan primeiru halo konstrusaun ba Gruta Maria Rainha Da Paz nee hahu iha tinan 2019, no remata iha tinan 2021.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here