Heroi Sira Luta ho Domin ba Ukun Rasik Aan

Padre João Tamono SVD. (Foto: STL/Emerenciana Pinto)

UATOLARI, STLNEWS.co – Timor nia indepedensia laos fasil maibe liu husi luta naruk husi Heroi sira nia, no heroi sira nia luta ho domin no forsa neebe iha too balun fo aan ba mate hodi hetan indepedensia.

Kestaun nee hatoo husi Padre João Tamono SVD, liu husi homilia bainhira selebra misa loron heroi sira nia iha Igreja Darabai, Kuarta (30/12/2020).

Padre João hatete, heroi sira fo aan ba rai liu husi nia forsa, liu husi forsa hasoru inimigu no hanoin liu husi estratejia no liu husi nia matan.

“Fo aan liu forsa no hanoin no tuir mai fo aan liu husi buat neebe nia iha, fo buat neebe mak diak liu husi sira nia luta no lao dook husi nia familia no nia sasan, prontu fo aan liu husi buat neebe nia iha hodi lakon nia rai, nia uma, nia familia hodi defende lialos” hatete Padre João.

Padre hatutan ema heroi ida prontu fo aan no prontu fo nia vida ba povu no ba patria liu husi fo hanoin, fo nia forsa, no fo buat hotu lao ho sakrifisiu domin, no laiha heroi ida mak laos ho domin.

“Tamba nia domin ba ema seluk tanba nia domin ba patria mak sakrifika nia moris, no ema neebe mak serbi ho domin mak fo aan ba maromak atu tulun no akompanha sira iha sira nia luta ba libertasaun nasaun” katak Padre.

Bibi Atan kreda nee hatutan tanba sa ohin loron rame-rame bolu Heroi Asuwain no sunu lilin ba sira tanba primeiru liu husi sira nia ain fatin luta ba libertasaun nasional, tanba nee mak presiza hatoo agradese ba heroi sira nia luta.

Iha biban nee Padre mos husu sarani sira kontinua reza ba Heroi sira nunee sira nia klamar bele haksolok iha lalehan.

Valoriza nafatin mos heroi hotu neebe mak balun mate ona no valoriza nafatin mos luta nain neebe mak sei moris, no valoriza mos ema hotu nia kontribuisaun.

“Ohin ita mos termina estratejia luta iha ambiente foun no ohin iha heroi sira nia loron ita mos permite estratejia luta iha ambiente foun dezenvolvimentu liu husi serbisu makaas hotu hodi dezenvolve nasaun nee, problema iha nafatin hanesan uluk heroi sira hasoru inimigu hasoru tentasaun oin-oin” katak nia.

Nia hatutan ohin loron Timor Leste mos hasoru Inimigu boot mak pandemia Covid-19 tanba iha Timor leste Covid-19 kona ema hamutuk nain 13, tanba nee husu ema hotu atu hadook husi Covid-19 liu husi fase liman ho sabaun no uza maskara hodi prevene moras aat nee.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here