WEDAUBEREK, STLNEWS.co – Juventude Wedauberek, Aldeia Tahubein, Suku Mahaquidan, Postu Administrativu Alas, Munisipiu Manufahi, entuziasmu kria pas no estabilidade, maski involve iha Grupu Arte Marsiais (GAM) neebe la hanesan.
Tuir Xefi Aldeia Tahubein, Elias Barreto katak, GAM sira nee buka atu ajuda malu, sai maun alin ka bin alin, nee mak diak.
Juventude iha Wedauberek, sira involve GAM oi-oin, maibe sira sempre hadomi malu, la halo problema, sira unidade hodi nafatin kria pas no estabilidade.
“Nudar Xefi Aldeia, hau sempre koalia ba sira katak bele involve iha GAM, maibe tenki hadomi malu, ami hadomi imi, no imi hadomi ami, atu ita nia bairu nafatin iha pas no estabilidade”, katak Xefi Aldeia Tahubein, Elias Barreto, iha Wedauberek, Sesta (01/09/2023).
Nia haktuir, bainhira kada GAM sira loke iha Wedauberek, nudar aldeia hetan konvite hodi partisipa sira nia abertura, i rona deklarasaun husi lider GAM sira diak tebes, maibe dala ruma joven balu ka individu balu mak uza sala.
Nia husu ba joven Tahubein atu mantein pas no estabilidade ba oin, hodi labele banati tuir ema seluk nian neebe baku malu, oho malu Tanba arte marsiais nee buka malu sai maun alin no ajuda malu.
Nia parte louva joven Aldei Tahubein, tanba bele iha fatin-fatin haree informasaun ema oho malu, baku malu, maibe Aldeia Tahubein seidauk akontese.
(gui)
