SUAI, STLNEWS.co – Jornalista nain 18 neebe reprezenta media Estatal no media privadu halo vizita ba kompanhia Star King Raw Material Industry Unipessoal.Lda, hodi hatene klean liu tan prosesu produsaun mineiru.
“Kompanhia Star King Raw Material Industry Unipessoal.Lda sira la presiza halo peskiza ona, tanba sira foti fatuk ho rai henek deit, neebe fatuk ho rai henek iha mota nee la presiza estudu makaas, neebe sira nia fatin manning area ou manning site ka fatin kee mak iha mota, bainhira foti iha neeba sira mai tau iha fatin hodi halo prosesamentu,” hatete Diretor Asuntu Diresaun Mineiru ANPM, Rafael de Araujo bainhira akompanha jornalista sira halao site vizit ba iha fatin eksplorasaun mineiru iha Suku Belecasac, Maucatar, Covalima, Sesta nee (24/3/2023).
Nia hatete, bainhira atu ba too iha atividade prosesamentu nee, kompanhia foti fatuk ho rai henek sira iha mota, hafoin lori ba iha fatin prosesamentu.
“Atividade prosesamentu mak sira lori mai prosesa iha stone crusher, nee mak atividade iha area mineiru, peskiza, manning, kee “eksplorasaun”, prosesamentu, makina neebe dulas fatuk nee naran Stone Crusher, neebe sei produs fatuk ho nia medida ketak-ketak, ida nee mak prosesamentu,” dehan nia.
Nia afirma, hafoin remata ona prosesamentu, sira sei tau hamutuk fatuk sira nee iha fatin ida, konforme sira uza fatuk nee atu halo ba saida, bainhira hakat fali ba tratamentu, sira foti fali material ba faze tratamentu dala ida tan iha Asphal Mixing Plant (AMP), hafoin halo prosesamentu no tratamentu, sira produs fali saida mak sira presiza, ikus liu mak sira transporta.
Lisensa neebe ANPM fo ba kompanhia nee kada tinan fo, bainhira sira desidi hapara sira nia atividade mineiru, entaun kompanhia presiza halo reabilitasaun ba fatin neebe sira eksplora ba.
“Sira fo lisensa ba tinan-tinan, agora konforme sira nia planu pedreiru nee lao tuir durasaun tempu, kuandu aban bainrua mak sira lakohi ona atu renova lisensa hodi termina sira nia atividade mineiru, entaun ita dudu sira ba halo reabilitasaun, mezmu aban bainrua mota nee sei kaber mesak deit, tanba udan, maibe ita sei mai halo fali inspesaun, barazen ruma aat sira tenki hadia,” informa nia.
Nia informa, bainhira kompanhia desidi lakohi atu renova fali kontratu, sira tenki hadia hikas fali ka reabilita hikas fatin nee antes taka sira nia atividade.
“Karik rai nee kompanhia nian laiha problema, bainhira rai nee sira halo akordu ho komunidade ruma, entaun konforme komunidade nia hakarak, bainhira komunidade dehan lae ami hakarak ida nee halo mos hotu kedan, sasan sira nee tenki hasai hotu fali, hadia fila fali para komunidade bele uza fali rai nee,” katak nia.
Espera liu husi site vizit nee jornalista sira bele komprende ona lalaok husi atividade mineiru iha terenu, saida mak aplika iha nee, sei aplika ba iha atividade mineirus boot ruma.
“Lalaok ida nee mak ita sei aplika, hahu husi foti fatuk manning site, ema bolu area eksplorasaun nia, lori mai tama prosesamentu, produs material sira nee, muda fali ba iha tratamentu, depois mak transporta fila fali konforme nesesidade, se atu halo uma sira sei lori ba halo uma, se atu halo estrada sei lori ba halo estrada,” hatete nia.
Ida nee mak atividades mineiras, mais iha atividade nee nia laran, iha atividades prosesamentu, iha mos komponenti lubuk mak suporta. Bainhira fo lisensa ambiental ba kompanhia sira, ANPM sei aprova pokete nee lisensa ambiental nee hamutuk deit.
“Kuandu kompanhia ba trata dokumentus hodi hetan lisensa ambiental, sira nia dokumentu nee ita bolu dehan Panu Jestaun Ambienti (PJA), entaun iha PJA sira koalia hotu ona sira nia planu, durante makina nee traballha, atu redus rai rahun nee halo nusa? Laos rai rahun deit,lian ka vibrasaun husi makina, entaun iha neeba sira koalia hotu ona sira nia planu, rai rahun amj sei redus hanesan nee,lian ninian ami sei halo hanesan nee, neebe buat sira nee maka ita aprova pakote hamutuk deit,”tenik nia.
Konaba mitigasaun ANPM sempre mai halo monitorizasaun no inspesaun ba kompania sira iha baze.
“Normalmente ita halo monitorizasaun no inspesaun,hanesan horsehik (kinta-red) hau ezemplu balun,iha lei nee bele fo dalan ba ANPM, ida maka notifika sira antes, se iha semana oin atu mai,neebe bain-bain ita mai sira prepara aan ho diak,balun fali ita bolu random inspection,ita mai sira lahatene ida, hakfodak ita para tiha kareta iha uma oin, nee lei fo dalan ba ita,”akresenta nia.
Iha fatin hanesan, rerezentante Empreza Star King Raw Material Industry Unipessoal.Lda, Agostinho Soares Lay haktuir, Empreza Star King Raw Material Industry Unipessoal.Lda sempre halao tuir regulamentu neebe fo sai husi ANPM.
“Ita “Empreza Star King Raw Material Industry Unipessoal.Lda” antes nee sei submete dokumentus ida naran Planu Jestaun Ambiental (PJA), iha PJA nia laran,iha kedas planu kompanhia atu halo monitorizasaun i liu-liu oinsa mak kompanhia rasik atu mitigate para bele halo predisaun saida mak sei akontese iha futuru,” haktuir Agostinho.
Nia relata, ligado ho parte saude nia iha atividade mineiru neebe Empreza Star King Raw Material Industry Unipessoal.Lda halao.
“Ligado ho saude ba traballhador, Empreza sei asegura uluk traballhador sira neebe halao servisu iha nee, entaun asegura uluk sira nia saude no mos seguransa ba traballhador sira nia aan rasik, nee duni ekipamentu neebe sira uza nee, normalmente ema neebe iha esperensia duni,halao operasaun ba ekipamentus sira nee,”hatete nia.
Produtu mineiru neebe Empreza Star King Raw Material Industry Unipessoal.Lda halao prosesamentu nia rezultadu mak uza ba konstrui uma no halo estrada.
(cri/jos)
