Juventude CNRT Prontu Fo Votus Ba MBXG

Prezidente OJP CNRT Munisipiu Baucau, Eduardo Filipe Ximenes (Foto: STL/Crisogono Magalhães)

BAUCAU, STLNEWS.co – Liu husi atividade mini konsolidasaun OJP (Organizasaun Juventude Partidu) CNRT iha Munisipiu Baucau, organizasaun massa juventude partidu CNRT prontu fo votus ba Maun Boot Kay Rala Xanana Gusmão (MBXG).

Atividade ohin nee, ita halo mini konsolidasaun ida, ba juventude partidu CNRT Munisipiu Baucau nian.

“Ho objetivu atu dezamina informasaun liga ba projeitu Tasi Timor neebe durante maun Xanana hamutuk ho eis Prezidente ANPM no eis Prezidente Timor GAP,” katak Eduardo Filipe Ximenes, Prezidente OJP CNRT Munisipiu Baucau, ba STL iha salaun Centru Convensaun Baucau, Baucau, Domingu (27/09/2020).

Nia katak, iha konsolidasaun nee mos laos sensibiliza informasaun sobre Tasi Timor nian deit, maibe sei fo mos tomada posse ba membru foun OJP Munisipiu Baucau nian no kuadrus OJP nasional mos sei fahe informasaun konaba evolusaun politika iha rai laran, karik mosu eleisaun antesipada saida juventude CNRT sei halo.

“Karik iha tempu badak maka mosu eleisaun antesipada, juventude CNRT Baucau prontu fo konfiansa tomak ba Maun Boot Kay Rala Xanana Gusmão hodi bele lidera fila fali CNRT ba ukun,” katak nia.

Nia dehan, liu husi sensibilizasaun informasaun nee mos, ho hanoin ida atu fahe informasaun neebe ligadu ho politika CNRT ba futuru liu liu politika CNRT nian neebe desidi atu dada kadoras mai Timor.

“Atividade nee importante tebes, tanba bele fahe informasaun ba kuadru militante OJP CNRT Munisipiu Baucau, para bele akompana informasaun, neebe liga ho dezenvolvimentu Greater Sunrise ba juventude CNRT,” dehan nia.

Nia haktuir, depois atividade nee hotu estrutura OJP Nasional hamutuk ho reprezentante estrutura Nasional Partidu CNRT sei fo mos posse ba membru foun OJP CNRT Baucau.

“Total posante neebe ohin atu simu pose nee hamutuk trinta ital, sira nee kompostu husi Postu Administrativu 6,” tenik nia.

Husi observasaun neebe STL asesu iha terenu atividade konsolidasaun OJP CNRT iha Baucau, sei fo mos posse ba membru foun OJP Munisipiu Baucau i fahe mos informasaun sobre tratadu tasi Timor ba partisipante sira, atividade nee marka prezensa mos estrutura CNRT Munisipiu Baucau, OJP Nasional, OJP Munispiu Baucau, Koordenador Partidu CNRT Cristu Rei, no estrutura Nasional CPN reprezenta husi Adérito Hugo da Costa. *

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here