Juventude Postu Administrativu Same 150 Hili Dalan Sai membru OJP CNRT

Juventude husi Postu Administrativu Same, Munisipiu Manufahe hili dalan sai membru Organizasaun Juventude Partidu (OJP) CNRT, juventude hirak nee hanesan eleitores foun i sira hetan konsolida mos husi OJP no CPN CNRT nasional. (Dok: STL)

MANUFAHE, STLNEWS.co – Juventude husi Postu Administrativu Same, Munisipiu Manufahe hili dalan sai membru Organizasaun Juventude Partidu (OJP) CNRT, juventude hirak nee hanesan eleitores foun i sira hetan konsolida mos husi OJP no CPN CNRT nasional.

Haktuir Manuel da Silva hanesan Koordenador OJP CNRT Manufahe hatete, konsolidasaun OJP iha munisipiu Manufahe nian, atu hametin partidu CNRT, tanba ba oin atu sira sai hanesan ema politika iha OJP CNRT nian.

“Joven sira iha postu administrativu Same nee ihan 150 pesoas, neebe rekrutamentu nudar eleitores foun ba iha OJP CNRT, i sira nia rekrutamentu nee joven sira husi tinan 17 ba leten”, katak Koordenador OJP CNRT Manufahe, Domingu (04/10/2020).

Nia dehan, sira agora dadaun husi postu administrativu Same nian deit lainklui postu tolu, tanba nee nia parte husu ba estrutura nasional atu bele halao mos atividade nee iha postu seluk, selae informasaun latoo iha postu sira seluk.

Nunee mos Patricino Fernandes hanesan Koordenador Partidu CNRT munisipiu Manufahe katak, atividade ida nee normal iha Munisipiu Manufahi neebe mak organiza husi OJP sira hodi organiza, hanesan bain-bain partidu politika sira nian.

Nia dehan, iha atividade halo konsolidasaun ba nia estrutura hanesan mos konsolida militantes, simpatuzantes sira hodi lori mensajen partidu politiku nian hanesan CNRT nia vizaun saida no hakarak saida atu projeta tan ba povu no nasaun Timor-Leste ba oin.

Tuir Patrocino, atividade nee halao ona iha munisipiu lubuk ida, hanesan Bobonaro, Lospalos, Aileu, Manatuto no mos Same, iha atividade nee sira konsentra liu atu oinsa mak halo rekrutamentu ba eleitores foun neebe mak seidauk iha partidu. I oinsa mak atu joven sira husi partidu CNRT nian atu lori hanoin CNRT nian no vizaun partidu nian hodi lori ba fahe tutan ba joven sira atu iha eleisaun tuir mai sira mos iha direitu atu foti opsaun politika.

Hafoin hetan informasaun husi estrutura nasional OJP, CPN no CDN sira mos halao komprimisiu de onra ba partidu. Iha komprimisiu de onra nee dirije husi Vice Prezidente CDN (Consselu Diretivu Nasional) atual Deputadu Bankada CNRT Arão Noe. Antes tama ba kumprimisiu de onra Arão Noe husu karik iha ema obriga atu tama OJP CNRT, maibe joven sira nee hatan katak sira rasik hili dalan sai membru ba OJP CNRT permanente, tanba hakarak atu hatutan politika, prinisipu no vizaun partidu CNRT liu-liu maun boot Kay Rala Xanana Gusmão nian.*

Reportajen: Guilhermina Franco
Editor: Ekipa STL

LEAVE A REPLY

Please enter your comment!
Please enter your name here