Kaben Nain Devorsiu Tanba Lakon Fiar Iha Orasaun

Tuir Padre Manuel katak, kaben nain neebe simu ona sakramentu kaben ikus hili dalan devorsiu nee tanba lakon fiar iha vida orasaun. (Foto: STL/Emerenciana Pinto)

BAUCAU, STLNEWS.co – Tuir Padre Manuel katak, kaben nain neebe simu ona sakramentu kaben ikus hili dalan devorsiu nee tanba lakon fiar iha vida orasaun.

Kestaun nee hatoo husi Amo Paroko Santo Antonio Katedral Baucau, Padre Manuel Da Silva Ximenes SDB ba STL, bainhira remata Misa Iha Igreza Katedral, Domingo (11/10/2020).

Padre Paroko nee dehan kaben nain sira premeiru simu tiha sakramentu kaben no sira halo ona sira nia komprimisiu ida ba maromak liu husi halo juramentu ba malu katak hadomi malu too mate maibe ikus mai lahadomi malu too mate hodi husik oan no feen laen nee fraku iha vida orasaun.

“Sira jura ona hadomi malu too mate maibe ikus sira husik sira nia oan sira nia laen sira nia feen husik hanesan nee deit nee signifika katak ita fraku iha ita nia vida orasaun, tanba nee mak diabo intenta ita husi dala oin oin ikus mai sobu ita nia familia, tanba nee hau husu familia foun sira liu liu kaben nain sira hakaas aan hadomi imi nia vokasaun nuudar kabe nain” dehan Padre Manuel.

Padre hatutan kaben nain nee laos hanesan buat neebe mak babain, maibe iha obrigasaun boot neebe iha ba familia atu akompanha malu proteze malu, tulun malu, iha tempu diak no tempu susar atu lori familia sai sagradu no sai ezemplu tuir familia Nazare nia.

“Dala ida tan konvida kaben nain sira katak iha fulan ida nee fulan Outubru importante ba ita reza tersu ba imi nia familia, intensaun idak idak ba imi nia familia ba imi nia oan, laen, feen, no mai misa hodi simu komunhao no hanoin imi nia oan laen feen iha Imi nia orasaun idak idak “ katak Padre.

Iha biban nee padre mos husu ba sarani neebe mak halo ona juramentu ba maromak katak hadomi malu too mate, diak liu kompre promesa neebe mak iha nunee bele sai familia neebe mak harmonia hodi lao tuir familia nazare nia ain fatin.

Nia mos hatutan familia ou kaben presiza mos hatudu ezemplu neebe mak diak ba oan sira nunee mos iha sosiedade nia leet, atu nunee joven sira bele lao tuir karik harii ona familia, katak familia presiza suporta malu, tulun malu iha tempu diak no aat nia laran no hadomi malu iha tempu saida deit tuir juramentu neebe mak halo ona.

Nunee mos iha fulan nain feto nee familia idak idak presiza mos halo orasaun hodi reza ba malu atu nunee bele hadook aan husi tensaun hotu husi familia.*

Reportajen: Emerencian Pinto
Editor: Ekipa STL

LEAVE A REPLY

Please enter your comment!
Please enter your name here