MEHARA, STLNEWS.co – Sekretariu Jeral (SekJer) Partidu CNRT, Francisco Kalbuadi Lay hatete, eleisaun parlamentar tinan 2023 nee todan tebes, tanba nee nia husu ba estrutura Partidu CNRT iha Suku Mehara, atu servisu makaas hodi lori hikas Xanana ba kaer ukun.
“Ita hatene katak eleisaun parlamentar nee todan, tanba nee ita hotu-hotu halibur malu iha fatin nee atu keta haluha, komesa ohin ba oin, hahu husi Koordenador Munisipiu too nasional, husi postu hotu-hotu tenki servisu makaas, hakbesik aan ba povu hodi tane povu nia votus. Nunee ita bele lori fali maun boot Xanana ba kaer ukun iha tinan 2023,” dehan SekJer Partidu CNRT Francisco Kalbuadi Lay, ba STL iha Suku Mehara, Postu Administrativu Tutuala, Munisipiu Lautem, Segunda (01/08/2022).
Nia haktuir, José Ramos Horta daudaun nee sai ona prezidente ba povu tomak, laos ba Partidu CNRT, signifika hafoin iha loron 20 fulan Maiu simu pose, Horta sai ona prezidente ba ema hotu-hotu.
Iha biban nee, Sekretariu Jeral Partidu CNRT, Francisco Kalbuadi Lay, hatoo mos apresiasaun ba fiskais CNRT nian, neebe iha eleisaun prezidensial hahu husi primeira volta no segunda volta konsege asegura votus kandidatu, José Ramos Horta, too hetan vitoria iha eleisaun.
(cri)
