BAUCAU, STLNEWS.co – Coronel de Infantaria Jose da Costa Soares (Trix) simu tomada de pose troka Komandante Komponente Terestre Baucau, Tenente Coronel de Infantaria Renilde Corterreal e Silva.
Tuir Xefi Estadu Maior das FALINTIL – Forsa Defeza Timor Leste (F–FDTL), Tenente Jeneral Domingus Raul (Falur Rate Laek) hateten, komponente terestre hanesan komponente ida, neebe espesial tebes ba forsas armadas sira neebe sai hanesan komponente operasional ida tuir sistemas de forsas no tuir lei defeza nasional no estatutu organika F– FDTL nian neebe vigor. Nunee mos defini iha dokumentus estrutural sira hanesan konseitu estratejiku defeza i seguransa, konseitu estratejiku militar, misaun de F-FDTL no dispozitivu de forsas armadas territoriu laran tomak atu F–FDTL kumpri nia misaun no tarefas sira neebe mak defini ona iha lei no dokumentus.
“Ita tenki kapasita ita nia F-FDTL liu – liu komponente terestre tuir organiku pessoal no material neebe mak produz husi gabinete forsa vinte vinte, ita tenki moderniza ita nia forsas armadas tuir padraun internasional, hodi garante estabilidade no moris hakmatek ba povu hodi fo oportunidade ba ita nia governu, hodi implementa nia programa no dezenvolvimentu nasional iha tinan lima nia laran ho susesu,” haktuir Falur Rate Laek liu husi nia diskursu iha serimonia tomada de pose iha Baucau, Lanud, Segunda nee (11/04/2022).
Nia dehan, forsas armadas mos iha misaun dominiu de kontrasaun tekniku militar interna diplomasia militar iha nivel rejional no global, tanba nee F-FDTL tenki iha kapasidade militar ida neebe naton tuir padraun internasional atu bele iha kbiit ba interoflabilidade iha ezersisiu konjuntu no kondenadus konferensia no seminar internasionais, tantu iha nivel sudeste aziatiku no mos iha ambitu CPLP iha nivel bilateral, trilateral no multilateral.
Partisipante neebe hola parte iha serimonia nee mak Xefi Estadu Maior das F-FDTL, Tenente Jeneral Domingus Raul (Falur Rate Laek), Komodoro Pedro Klamar Fuik, Administrador Munisipiu Baukau, Vikeke no Lospalos, Komandante Polisia Nasional Timor Leste (PNTL) Baucau, Vikeke no Lospalos, assesores internasionais, relijioza/relijiozu, komandante komponente e unidade das F- FDTL no Ministeriu Defeza.
(EST/02/efi)
