DILI, STLNEWS.co – Komemora ezistensia ba loron Kongresaun Societas Verbi Divini (SVD) ba dala 146, padre sira hamutuk ho sarani sira iha Batugade realiza kompetisaun biblia no seluk tan.
Iha selebrasaun nee, Padre Richardo Pasang SVD ba STL liu husi telefone Kuarta nee (08/09/2021) hatete, SVD moris iha loron 8 fulan Setembru. Loron ida ne mos igreja selebra Natividade Santa Maria.
Padre nee dehan, atu komemora loron nasimentu Kongregasaun SVD nian iha mundu, Kongregasaun SVD Timor Leste halo atividades kompetisaun biblia mak hanesan lee biblia, kanta salmo, kuis biblia no dramatizasaun biblia ba joven katoliku sira husi Estasaun Batugede, Estasaun Palaka no mos grupu THS THM Estasaun Batugede.
“Fokus ami nia atividades relasaun ho biblia ho objetivu atu joven sira bele hadomi biblia nuudar naroman hodi leno ita nia dalan moris nuudar kristaun katolika,” haktuir Padre Ricardo.
Nia hatutan, atividade nee hahu husi loron Domingu, loron 5 fulan Setembru to’o loron 7 fulan Setembru iha uma formasaun SVD Saun Gabriel Batugede.
Tuir observasaun neebe mak STL hetan Loron 8 fulan Setembru Igreza Katolika selebra Festa Natividade Santa Virjen Maria. Inan Virjen Maria nia moris nuudar esperansa boot ba mundu, no inan doben halao dadaun knaar salvasaun nian no mai mundu ho nia moris.*
Reportajen: Emerenciana Pinto
Editor: Ekipa STL
