Lú Olo: La Konese Liberdade, Lamatenek

Prezidente Republika Francisco Guterres Lú Olo hatete nasaun ida la konese liberdade bainhira lamatenek. (Foto: Media PR)

BAUCAU, STLNEWS.co – Prezidente Republika Francisco Guterres Lú Olo hatete nasaun ida la konese liberdade bainhira lamatenek.

Prezidente Republika Francisco Guterres Lú Olo hatoo kestaun nee liu husi nia diskursu bainhira vizita Eskola Sekundaria Jeral Kilik Uaigae iha Caibada, Munisipiu Baucau, Kuarta (16/12/2020).

“Nasaun ida la konese nia liberdade, bainhira nia lamatenek, tanba nee duni, eskola sira neebe halo iha Timor-Leste laran tomak iha nanis ona molok iha governu dahuluk too agora, soke governu sira liu ona nee prontu, maibe governu ida agora nee fo prioridade ba edukasaun, saude no agrikultura,” dehan PR Lú Olo.

Xefe estadu dehan, eskola neebe didin ho kalen no piku inklui eskola baziku VIII neebe kakuluk monu ona nee obra husi governu dahuluk too agora nian.

“Eskola sira nee obra husi governu dalas ida ba dalas seluk, neebe atu diak ka atu aat nee sira hotu nia obra. Agora VIII governu nee iha prioridade barak oinsa mak bele investe liu iha ema ka rekursu umanu liu husi area edukasaun, saude no agrikultura,” dehan PR.

Aman ba nasaun nee mos apelu ba prefesor sira katak, edukasaun ba oan sira nee importante tebes, liu-liu ba sira neebe sei kiik-oan neebe eskola iha nee.

“Sira neebe aban bainrua sai husi eskola ida nee, sira ba universidade para sai matenek diak liu tan hodi kaer metin ita-nia nasaun nee nia destinu ba oin. Signifika sira hotu neebe mate ba rai no otas hanesan ho ami nee, sira-nia matenek mak lori sosa liberdade, entaun agora liberdade labarik sira-nian nee oinsa mak atu kontinua,” PR sublina.

PR hatutan hakarak halao dezenvolvimentu ba oan sira iha futuru, tenke aposta duni iha seitor edukasaun neebe area nee importante tebes. Tanba nee bainhira povu ida la konese nia liberdade mak ema seluk sei mai hanehan.

Nunee mos sei sai ofendidu nafatin bainhira Timor oan la matenek ida, tanba nee presiza matenek, para ema labele hanehan, labele bosok bei-beik, para ema labele manipula bei-beik, tanba eskolla halo tiha ona.

“Eskola ita-nia mak liberdade, entaun signifika ita hakarak moris saida mak ita buka, tuir ita-nia hakarak,” katak nia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here