SUAI, STLNEWS.co – Nain ba Hotel Elivan Suai, Angelo de Jesus husu governu lokal presiza kordena didiak ho komunidade no emprezariu lokal sira, bainhira implementa mega projetu Suai Supply Base.
“Hau hanoin iha parte hotu ita labele atende hotu, maibe ami husu ba governu lokal atu kordena didiak ho komunidade no emprezariu lokal, bainhira implementa mega projeitu Suai Supply Base, nunee sira bele halo investimentu sira iha hotel, para bele fornese fatin toba no fatin han, tanba iha emprezariu lokal balun iha kbiit bele fornese ai haan no fatin toba,” dehan nain ba Hotel Elivan, Angelo de Jesus ba STL iha Hotel Elivan, Suai Vila, Kinta nee (23/3/2023).
Nia hatete, iha governasaun anterior nee, ministru balun mai fo atensaun ona ba povu Suai oan tomak atu prepara aan, mais tuir nia haree, preparasaun nee seidauk masimu.
“Ami nia preparasaun seidauk sufisienti, tanba kuartu ba Very Important Person (VIP) seidauk iha, aleinde fasilidade sira neebe iha kada kuartu nee iha deit haris fatin, kama ida, meza, kadeira no Air Conditioner (AC), ida nee deit mak ami nia preparasaun, mais ba oin ami sei prepara hela fatin ba VIP sira,” hatete Angelo.
Nia afirma, antes harii hotel, nia uza rasik nia osan, liu husi faan Ai Kameli, hafoin hetan ona osan husi faan Ai Kameli, fo empresta ba osan nee ba maluk sira neebe presiza ho funan 10% balun 15%.
“Hau uza, hau nia osan rasik, hanesan ita hotu hatene katak, uluk tempu funu ita hotu halai ba ai laran, fila fali ho buat ida laiha, ami hahu lo-loos nee bainhira hau halo pembibitan Ai Kameli, Hau husu agradese boot ba CARE Internasional, mai sosa hau nia Ai Kameli, entaun hau ba foti osan iha Banku ANZ iha 2004 ho montante US$ 4.200, fundus ida neebe hetan husi faan Ai Kameli nee mak hau fo impresta ba ema ho funan 10% balun 15%, husi nee mak hau nia osan nee komesa sae iha 2008-2010,” katak Angelo.
Bainhira osan funan nee komesa boot, desidi harii kompanhia hodi ba kaer projeitu Infrastruktura Dezenvolvimentu Distrital (PIDD) ho Pakote Desenvolvimentu Desentralizadu (PDD), rezultadu husi projeitu sira nee mak ikus mai harii Hotel.
Nia haktuir, iha nasaun barak-barak emprezariu neebe iha osan loke apartemen no Hotel.
Iha biban nee, nain ba Hotel Elivan nee mos husu ba nia maluk emprezariu sira, liu-liu emprezariu Suai oan neebe iha hanoin diak atu halo buat ruma hodi apoiu projeitu boot mina nian neebe atu mai iha iha Suai.
“Husu maluk emprezariu lokal sira, ita tenki prepara aan, liu-liu prepara fatin toba no hela, inklui prepara mos sasan baziku sira hanesan modo, naan no fos iha ona, sira la presija ba sosa tan iha fatin seluk mak mai tein hodi konsumu, tanba nee husu ita hotu atu prepara no hadia aan hodi atende projeitu boot neebe agora atu mai ita nia munisipiu,” hatete nia.
Nia haktuir, agora daudaun atu faan sasan deit mos Xineza mak domina, aleinde nee sira faan sasan sira la kualidade, tanba nee husu ba maluk Timor oan sira tenki kaer liman metin ba malu para bele lori Timor nee ba oin.
(cri/koa)
