Misaun COVID Xanana Iha Oecusse Remata

Lider karismatiku, Kay Rala Xanana Gusmão bolu Xefe Suku no Xefe Aldeia sira iha serimonia enseramentu Misaun COVID-19 iha Bairo Kiumaonteko, Aldeia Xanane Suku Costa, hameno ba xefe suku no Xefe Aldeia sira atu kopera ho komunidade tau matan ba fronteira, Sesta (28/8/2020). (Photo: STL News/Joseph Koa)

AMBENO, STLNEWS.co – Lider karismatiku Kay Rala Xanana Gusmão ninia misaun COVID-19 iha Rejiaun Administrativa Espesial Oecusse Ambeno (RAEOA) remata, hafoin lao haleo sub-rejiaun 4 hanesan Pantemacassar, Oesilo, Pasabe no Nitibe hasoru malu ho komunidade sira iha fatin konsentrasaun hamutuk 24 iha suku 18 hodi sensibiliza informasaun COVID-19 no asaun karitativa ba povu kbiit laek sira.

Misaun COVID-19 ho asaun karitativa neebe diriji direitamente husi Xanana Gusmão hahu iha loron Kuarta (19/8/2020) hahu halao asaun karidade ba prfonatu sira iha Oecusse, nunee kontinua kedan halao dialogu neebe organiza husi TVE iha Salaun Paroquia Igreja Nossa Senhora do Rosario Oecusse kuaze oras ida ho balun hodi esplika direitamente ba povu iha teritoriu Timor Leste laran tomak nomos rai liur kona ba misaun COVID-19, no halao asaun karitativa neebe suporta husi emprezariu nasional nomos emprezariu rejional, inklui maluk Timor oan balu neebe iha kbiit suporta programa nee durante Xanana haleo Rejiaun Administrativu Espesial Oecusse-Ambeno (RAEOA) durante loron 12.

Divulgasaun informasaun konaba perigu COVID-19 Iha Oecusse abertura iha semiteriu matebian Taul Tabes iha Oebaha Suku Taiboko, Postu Administrativu Oesilo, Rejiaun Oecusse hahu iha loron Kuarta (19/8/2020) no remata iha loron Sesta (28/8/2020). Iha loron Sabadu (29/8/2020), Xanana kontinua vizita fatin balu iha capital Oecusse no fila ba Dili ho Ro Success.

Iha aprezentasaun perigu COVID-19 iha Oebaha husi Xanana, povu tomak neebe partensia iha Suku Bobometo Aldeia Oebaha no Nianapu ho total populasaun kuaze 5000 resin sente hakfodak no tauk konaba moras COVID-19 neebe oras nee povu tomak iha rai boot no rai dezenvolvidu sira hanesan Amerika, Italia, Malaysia, Indonezia, Thailand, Australia no nasaun seluk-seluk tan. Ema mate barak tanba hetan hadaet moras COVID-19, mate hanesan nehek, esplika husi lider karismatika Kay Rala Xanana Gusmão iha Oebaha bainhira halo abertura.

Iha okaziaun nee, Xanana fo omenajen ba matebian Taul Tabes neebe oferese nia an mate ba rai doben ida nee iha tinan 1999. Nunee mos Xanana ho emprezariu Oecusse oan no nasional oferese aihan nesesidade baziku ba komunidade sira iha Oebaha. Iha serimona enseramentu misaun COVID-19 iha Oecusse neebe lokaliza iha Aldeia Sanane Bairo Kiumaonteko Suku Costa Postu Administrativu Pantemacassar, Rejiaun Administrativa Espesial Oecusse-Ambeno neebe komunidade suku Costa partisipa maximu kuaze 8000 resin, Sesta (29/8/2020) Xanana dehan ninia misaun COVID-19 iha Oecusse remata.

“Ohin ho imi, hau nia misaun COVID-19 remata ona iha Oecusse, hau mesak labele halo buat ida. Hau agradese ba komisaun COVID-19 iha Oecusse neebe bele organiza aan, hamutuk ho xefe suku no komunidade hodi lori hau nia misaun atu koalia ho komunidade konaba COVID sai realidade ida neebe ita bele dehan katak bele taka dalan ba COVID atu tama estraga povu Atoni. Agradese ba hotu-hotu nia laran luak neebe kontribui hodi tau matan ba sira neebe presiza liu tulun,” dehan Xanana iha Oecusse.

Hatutan pajina 2

LEAVE A REPLY

Please enter your comment!
Please enter your name here