DILI, STLNEWS. co – Governu liu husi Ministeriu Obras Publika (MOP) identifika ponte kuaze 10, kompostu husi parte Weste, Leste no Sul, neebe hetan estragus husi udan iha fulan hirak liu ba, ponte sira nee tama ona ba prosesu dezenhu.
Tuir Diretor Nasional Estrada Kontrolu no Chea, Milton Ramanata de Castro Montero hatete, ponte hirak meebe hetan estragus husi inundasaun nee kuaze 10 no agora prosesu dezenhu besik finaliza ona, balun halo ona normalizasaun temporariu.
“Ponte sira neebe hetan estragus iha munisipiu sira, maka hanesan Baukau, Lospalos, Vikeke, Same no Kovalima, espesial ba ponte ida iha Vikeke nian, maibe agora daudaun ita normaliza tena no bele fasilita kareta sira halo movimentu ba mai ona,” dehan Diretor nee ba STL iha JL Vila, Sesta (22/07/2022).
Diretor nee afirma, ponte neebe iha Munisipiu Vikeke hetan estragus husi udan, MOP orienta kedas ekipa hodi halo observasaun direita no halo kedas normalizasaun, ponte nee uza provizoriu deit, ekipa foti ona dadus atu halo permanente. Iha ponte Bilimau nee rasik mos iha kompanhia Salimagu hadia fila fali, agora besik hotu ona, tanba daudaun nee ekipa husi Obras Publiku Munisipiu Ermera halo ona normalizasaun.
(mad)
