DILI, STLNEWS.co – Relasiona ho udan boot neebe akontese iha loron Kinta horiseik (16/03/2023), halo mota tun hodi estraga uma rua, nomos estrada sira halo kondisaun ladun diak.
Akontesimentu nee iha Suku Eraulu, Postu Administrativu Lete Foho, Munisipiu Ermera.
“Uma rua mak hetan estragus, no husi uma rua nee iha uma ida mak hetan estraga total,” dehan Xefi Suku Eraulu, Domingos Madeira iha Ermera ba STL, Sesta nee (17/03/2023).
Madeira sublinha, uma rua neebe iha, ida hetan estragus total, tanba bee mota tama too uma uma laran, halo sasan sira estraga, no uma ida bee tama maibe ladun estraga makaas.
Tanba nee, husi sira nia parte tun ona iha terenu hodi haree direitamente, foti ona dadus balu, nomos imajen balu hodi sai hanesan evidensia atu haruka ba iha parte dezastre naturais hodi haree, nunee bele apoiu ba iha uma rua nebee hetan estragus.
Estrada husi Diresaun Mahohleta ba iha Lete Foho kondisaun ladun diak, tanba bee intupidu iha ponte oan ida, halo bee halai fatin la diak, too bee nakonu sai mai iha estrada hodi difikulta transporte publiku.
Nia esplika, iha fatin oan ida naran Manhohleta nee, iha mos ponte oan ida mak iha neeba, no udan kontinua halo ponte nee sei sai risku, tanba ponte nee momentu kompanhia monte veado halo nee, bronjon neebe sira halo kiik liu no tau rua nee besik malu, tanba nee buat foer hanesan duut neebe mota lori mai, tama hotu iha ponte nee nia okos, ikus mai halo intupidu, mota halai la diak, hodi rezulta bee sai too mai iha estrada laran no tama komunidade sira nia uma.
Rekomenda ba iha Ministeriu Obras Publiku (MOP) atu tau atensaun ba estrada liu-liu ponte neebe iha, atu tempu ida labele sai risku ba komunidade sira, nomos labele difikulta komunidade sira neebe halo viajen ba mai.
Tanba se la hadia lalais, mak kuandu mota tun makaas, sei halo ponte nee tohar.
(ter)
