DILI, STLNEWS.co – Relasiona mina folin sae, movimentu transporte paradu iha Munisipiu Baucau fo impaktu ba estudante sira la tuir aula prosesu aprendizajen, tanba hela dook.
Kestaun nee hatoo husi Diretor Eskola Publiku Ekonomia i Comersiu (EPEC) Baucau, Dionisio T. Ximenes ba STL liu husi telefone (07/04/2022).
“Hau haree katak alunus la partisipa, estudante 75 pesoas hela dook no la tuir aula prosesu aprendizajen,” dehan nia.
Nia dehan, movimentu transporte paradu difikulta ba estudante sira neebe maka hela dook la tama eskola, maibe atividade prosesu aprendizajen kontinua lao.
Dionisiu dehan, ohin inan aman mos rekomenda relasiona mina neebe folin sae, movimentu transporte paradu, maibe ida nee governu nia kompetensia.
Iha fatin hanesan, estudante Teofilho Ximenes hatete, senti tristi wainhira movimentu transporte publiku paradu, nee susar ba estudante sira neebe hela dook, oinsa atu ba eskola se bemo la halai, entaun halimar iha uma deit.
“Hau senti tristi bemo la halai, agora besik tama ba ezame primeiru periodu, oinsa profesor sira fo materia ezame nian, maibe bemo la halai susar tebes,” dehan nia.
(joa)
