BAUKAU, STLNEWS.co – Kandidatu Prezidente Republika (PR) Jose Ramos Horta hatete, wainhira nia eleitu sai Prezidente Republika, nia promete Munisipiu Baukau, Vikeke, Lospalos no Ermera sei sai zona espesial, hodi forma grupu hanaran komunidade ekonomika.
“Karik imi hili hau, tinan lima mai hau sei servisu metin ho Governu no Parlamentu Nasional, para hadia ekonomia iha rai nee lao ba oin,” kandidatu Prezidente Republika hatoo lia hirak nee liu husi dialogu iha Fatumaka, Baukau, Sabadu nee (09/04/2022).
Nia dehan, wainhira nia eleitu sai Prezidente Republika, nia sei buka atu hamutuk ho governu hodi tau matan ba Vikeke Baukau no Lospalos, tanba wainhia hanoin ekonomikamente Vikeke, Baukau no Lospalos bele halo grupu ida forma hanaran komunidade ekonomika ida.
“Baucau tenki espesialidade ba produtu oin-oin, Vikeke no Lospalos mos iha produtu oin-oin, liu-liu agrikultura,” tenik nia.
Aleinde nee, Ermera mos tenki sai zona espesial ida, tanba besik los Dili no iha populasaun barak, nunee bele aumenta produsaun kafe bele halo turizmu iha neeba, no sidade Dili aumenta bele muda ba Railaku, ba fatin sira nunee bele hamamuk Dili oituan.
(san)
