OEKUSI, STLNEWS.co – Pasajeirus sira gosta sae tum-tum no rendimentu kada loron depende ba pasajeirus, tanba tum-tum iha RAEOA barak.
Lia hirak nee hatoo husi Octoviano Caet hanesan ema neebe lori tum-tum ba STL iha RAEOA, Kuarta nee (06/09/2023).
“Loron ida ami hetan US$ 15, se karik pasajeirus barak, entaun ami hetan too US$ 20, depois osan sira nee ami rai hamutuk para ami bele sosa ekipamentus, karik tum-tum nee aat ami bele lori alat sira nee hadia, kada loron ami hetan rendimentu nee depende ba pasajeirus, maibe ita nian pasajeirus barak mak gosta sae tum-tum, tanba tum-tum iha RAEOA mos barak ona,” nia komenta.
Octoviano dehan, karik pasajeirus barak loron ida bele hetan too US$ 18, se lae hetan too US$ 25 nunee, no osan neebe hetan kada loron lori sosa nesesidade loron-loron nian, hanesan foos husi Padiae too Ponte Kais, ema ida US$ 2 resin. Husi Ponte Kais ba numbei ema ida selu US$ 1. Husi Ponte kais ba too ema ida US$ 5.
“Ita nian pasajeirus neebe urjenti nee sira gosta liu mak sae tum-tum, bainhira kareta laiha nee sira gosta sae mak tum-tum, nee duni ami nian servisu mak lori tum-tum buka pasajeirus neebe mak halo viajen ba mai iha Oekusi laran,” katak nia.
Nunee mos Carlito da Cunha ema neebe lori tum-tum dehan, tum-tum nee tula pasajeirus iha Oekusi laran deit, area remotas nee labele ba. Tum-tum iha Oekusi laran barak los, neebe depende ba pasajeirus sira, se karik pasajeirus barak, nee hetan rendimentu barak, maibe pasajeirus ladun barak, entaun rendimentu mos tuir ida nee.
Entretantu, Jose Nunes hanesan pasajeirus hatete, sae tum-tum husi Ponte Kais ba Xina Cruz ema ida selu 50 sentavus, tum-tum iha Oekusi barak, no ema barak gosta sae deit tum-tum, tanba lais liu.
“Tum-tum nee ema nain 6 mak sae, nee duni karik urjenti ruma ita bele sae mak tum-tum, tanba tum-tum barak,” nia deklara.
(jac)
