PD Apresia Asaun Karidade Xanana

Deputadu Partidu Demokratiku (PD), Antonio da Conceição ‘Kalohan’ ofisialmente entrega apoiu umanitariu hanesan fos, supermi no mina ba komunidade kbiit laek sira iha Suku Suni Ufe, Tersa (25/8/2020). (Photo: STL News/Joseph Koa)

NITIBE, STLNEWS.co – Prezidente Partidu Demokratiku (PD), Antonio da Conceição ‘Kalohan’, apresia tebes ho asaun karitativu no misaun COVID-19 husi Lider Karismatiku Kay Rala Xanana Gusmão iha Oecusse.

“Maun Boot Kay Rala Xanana ninia atividade ne’e, hau tuir dala tolu ona asaun karidade iha teritoriu Timor Leste laran tomak, hodi haree no akompania maun boot nia misaun ida liga ba COVID-19. Misaun ida ne’e importante teb-tebes, atu bele ajuda povu hodi nune’e bele hadook aan husi moras Corona,” dehan Deputadu Antonio da Conceição hafoin akompania Xanana halao asaun karidade iha Suku Suni Ufe, Tersa (25/8/2020).

Nia dehan, ema ladun haree importansia husi atividade ne’ebé maun boot Xanana halo ne’e, hola parte responsabilidade ukun nain sira nian, lolos ne’e, atividade sira hanesan ne’e, ukun nain ne’ebé kaer hela kbiit ukun Governu nian, maka tenki hola responsabilidade maximu hodi bele partisipa iha sensibiliza atu bele hases aan povu husi COVID-19 maibe sira la halo.

“Maun boot hola inisiativa ida ne’e, importante tebes tanba hanesan sidadaun ida hola responsabilidade ba vida nasaun ninian maibe Xanana laos hanesan sidadaun ida, luta ba rai ida ne’e, ba ukun rasik aan iha tempu ida ne’ebé difisil liu, ita bele salva ita nia populasaun, ho oras ne’ebé liberdade ona, atu povu tu’ur hakmatek iha ninia fatin ho oportunidade ne’ebé diak liu hakbesik aan ba ita nia povu, ba buat ne’ebé maka ita halo,” dehan nia.

Nia haktuir tan katak, durante ne’e luta libertasaun nasional, salva povu husi funu, ohin loron tur hakmatek ona, maibe COVID bele oho, tanba ne’e Xanana hakbesik aan ba povu hodi fo hanoin ba sira konaba moras ne’e.

“Atividade maun boot Xanana nian ne’e, membangun kesadaran sidadaun hotu-hotu nian atu bele senti katak, lapresiza deit sira ne’ebé maka kaer ukun, maibe tenke hola ezemplu diak ba buat neebe mak maun boot halo nee, hodi prevene povu sira nia saude,” nia akresenta.

Iha oportunidade hanesan, Lider Karismatika Kay Rala Xanana Gusmão dehan, asaun karidade no lori misaun COVID-19 laiha motivu politik maibe hanesan sidadauk ida, iha responsabilidade boot ba povu no nasaun ida ne’e, tanba ameasa COVID-19 ne’ebé maka ameasa iha mundu tomak inklui Timor Leste.

“Hau mai lori misaun COVID-19, ho asaun karidade, laiha motivu politika. Hau preokupa tanba nasaun dezenvolvidu sira ne’ebé ho fasilidade kompletu maibe labele salva sira nia povu, tanba ne’e husu atu labele politiza maibe asaun ida ne’e ho fuan no laran, tanba iha tinan 24, inan feto no katuas idozus sira nia luta ba ukun aan iha tinan 1999 liu husi loron konsultasaun popular mak nasaun ne’e hetan ukun rasik aan, ohin sira idade avansadu ona, presiza tau matan ba sira atu nune’e sira mos senti goza independensia ida ne’e,” dehan nia.

Tuir observasaun STL katak, hafoin halao asaun karidade no sensibiliza informasaun kona ba misaun COVID-19, Xanana kontinua ba vizita komunidade sira iha Suku Taiboko, Postu Administrativu Pante Macassar hodi sensibiliza informasaun ba povu konaba moras corona.

Reportajen: Joseph Koa

Editor: Ekipa STL

LEAVE A REPLY

Please enter your comment!
Please enter your name here