PN Husu Hadia Irigasaun Buloto

Reprezentante povu iha uma fukun Parlamentu Nasional (PN), husu ba governu liu-liu Ministeriu Agrikultura no Peska, atu hadia lalais irigasaun Buloto neebe lokaliza iha Munispiu Manatuto, tanba irigasaun nee aat. (Foto: Dokumentasaun STL)

DILI, STLNEWS.co – Reprezentante povu iha uma fukun Parlamentu Nasional (PN), husu ba governu liu-liu Ministeriu Agrikultura no Peska, atu hadia lalais irigasaun Buloto neebe lokaliza iha Munispiu Manatuto, tanba irigasaun nee aat.

Deputadu Bankada FRETILIN, Antoninho Bianco hatete, irigasaun Buloto durante nee governu la halo manutensaun, tanba nee ponte bee neebe mai husi Lakluta no Waimori lori rai henek hodi taka metin tiha bee dalan sira nee, tanba nee fornesementu bee ba povu agrikulktur sira natar ho tos ladiak.

“Agrikultor sira agora hatudu dadauk ona sira nia badinas, tanba nee natar kuaze hektares atu 700 maka oras nee lao, no agora sesta bazika atrai agrikultur sira sai badinas liu, tanba nee husu ba governu atu halo intervensaun rapida ba irigasaun nee, liu-liu bee dalan neebe taka metin ho rai, karik irigasaun nee diak maka ita fiar katak, rai sira neebe sei mamuk nee, agrikultur sira bele okupa hotu hodi halo natar, tanba problema neebe sira hasoru maka bee,” dehan Deputadu Bianco, liu husi sesaun plenaria, PN, Dili, Segunda (01/02/2021).

Nia afirma, governu tenke fo atensaun urjente, oinsa normaliza lalais tiha bee dalan, atu nunee fornesementu bee ba agrikultur nia natar bele lao diak, liu iha Manatuto, Laleia, no Bemase tanba povu agrikultur sira iha neeba hatudu duni sira nia badinas.

Hatan ba preokupasaun nee, Ministru Asuntu Parlamentar no Komunikasaun Sosial, Francisco Jeronimo hatete, problema irigasaun iha Manatuto; Buloto neebe rai taka too agora seidauk halo mantensaun, tanba nee nia rasik sei informa asuntu nee ba iha Ministeriu Agrikultura, atu bele hare urzentemente, tanba politika governu nian maka eduka povu agrikultor atu hasae produsaun iha rai laran.*

Reportajen: Madalena Horta/Domingas Soares
Editora: Carme Ximenes

LEAVE A REPLY

Please enter your comment!
Please enter your name here