Populasaun Aileu Agradese Xanana

Populasaun husi Suku hitu iha Postu Administrativu Liquidoe, Munisipiu Aileu agradese ba Lider Karismatiku Kay Rala Xanana Gusmão neebe hatudu domin ba Timor oan hotu iha ambitu Estadu Emerjensia ba pandemiku COVID-19. (Foto: STL/Efizenia da Costa)

AILEU, STLNEWS.co — Populasaun husi Suku hitu iha Postu Administrativu Liquidoe, Munisipiu Aileu agradese ba Lider Karismatiku Kay Rala Xanana Gusmão neebe hatudu domin ba Timor oan hotu iha ambitu Estadu Emerjensia ba pandemiku COVID-19.

Lider Karismariku nee hetan apoiu husi setor privadu balu hodi tulun komunidade kbiit laek sira iha situasaun Estadu Emerjensia neebe mundu tomak hasoru inklui Timor Leste.

Populasaun kbiit laek hamutuk 140 mai husi suku, Asubilitoho, Betulau, Bereleu, Fahisoin, Faturilau, Namulesso, no Manukasa, hatoo agradesimentu nee liu husi Administrador Postu Administrativu Lequidoe bainhira simu vizita Xanana ho asaun karidade iha Suku Namulesso, Liqudoe-Aile, Kinta (22/10/2020).

Populasaun sira husu ba lider Karismatiku, Xanana Gusmão atu tau atensaun estrada inklui dada lina estrisidade ba suku sira neebe seidauk asesu.

Administrador Postu Administrativu Liqudoe, Luis Damiao dehan, Xanana halo viajen haleu Timor-Leste hodi fo tempu vizita nomos fo apoiu ba populasaun suku hitu neebe presiza duni tulun iha momentu ida nee.

“Ohin loron solok tebes ba povu Liquidoe, tanba avo Xanana ho nia ekipa vizita mai hodi hatudu nafatin domin no fo apoiu ba povu sira liu-liu atu halo esplikasaun ba ita kona-ba mensajen dame no mensajen prevensaun COVID-19,” dehan Administrador de Postu nee.

Foto: STL/Efizenia da Costa

Administrador nee konsidera apoiu neebe povu sira hetan nuudar grasa ida, basaa tulun povu sira iha tempu Estadu Emerjensia. Maibe problema neebe populasaun sira enfreta maka kondisaun estrada sei aat inklui suku balun too agora seidauk asesu ba lina eletrisidade.

“Ami iha nee problema boot liu maka estrada aat, avo mai haree rasik halo ami nia populasuan susar atu lori produtu ba faan iha merkadu. Problema seluk tan maka ami nia suku rua hanesan Betulau no Faturilau ho aldeia balun, too agora seidauk asesu ba lina eletrisidade,” dehan Damiao.

Iha fatin hanesan, Lider Karismatiku, Kay Rala Xanana Gusmao dehan nia lao haleu Timor-Leste hodi fo apoiu aihan ba povu sira, hodi hatudu ba Timor oan sira katak, COVID-19 hatudu ezemplu diak ba Timor oan sira atu fo apoiu ba malu iha tempu sira hanesan nee.

“Ida hanesan ezemplu karik ita hasoru problema boot ruma iha ita nia rain, ita sei la tane liman ba rai liur, tanba ohin loron COVID-19 lori buat diak ida maka nee, ita fo liman ba malu hodi apoiu malu iha tempu susar hanesan nee. Hau lao ona ba rai barak hanesan, Afrika sira ukun aan kleur ona, maibe sira mos susar liu ita nian,” dehan Xanana.

Nia hatutan, iha ukun aan prosesu dezenvolvimentu tenki halo neneik, tanba problema orsamentu iha Parlamentu Nasional la fo dalan ba governu atu foti osan barak para halais prosesu dezenvolvimentu infra-estrutura iha Timor-Leste.

Xanana relata, aihan neebe nia fahe ba povu sira laos nia maka sosa, maibe Timor oan sira maka lolo liman ba malu hodi apoiu netik povu neebe presiza liu.

Lider Rezistensia nee rekonese nia hahu sosializa Planu Estrateziku Dezenvolvimentu Nasional (PEDN) 2011-2030 hahu husi Postu Administrativu Liquidoe, Munisipiu Aileu iha tinan 2009 liuba.

Xanana relembra, iha tinan 2009 liu ba, bainhira nia hahu halo konsultasaun ba planu PEDN iha kampu Liquidoe, rai udan makas, anin boot no kalohan taka metin rai ho kalohan la fo fatin.

Foto: STL/Efizenia da Costa

Nunee, nia husu kuku sira atu hamulak hodi hapara forsa natureza nee, maibe kuku sira la konsege halo buat ida, nunee ikus mai Xanana hamulak ba rai lulik derrepente rai udan, anin no halokan lakon hodi fo tempu ba nia halo dialogu ho populasaun sira iha altura neeba.

“Hau sei lembra iha nee duni ita hahu halo konsultasaun ba planu estrateziku maka mosu udan, anin no kalohan boot, ikus mai ita duni ses tiha kalohan, udan no anin hodi halo ema hotu admira,” dehan Xanana.

Iha parte seluk, Xanana apela ba joven sira atu hatudu komportamentu domin no kuda dame no labele tama grupu hodi hamosu konflitu no krime. Kontribui ba estabilidade seguransa iha rai laran.

Nia mos husu joven sira tenke prepara aan atu estuda iha area oin-oin, tanba too tempu ida lider sira mate, joven sira maka sei kaer destinu nasaun nee.

“Rai nee sei iha imi hotu nia liman, tanba too tempu ruma ami liu ona, imi joven sira maka tenki prepara aan hatudu komportamentu diak hodi kaer destinu nasaun nee iha ona imi nia liman hodi hamutuk hadia rai nee sai diak liu,” dehan nia.

Nasaun nee tuir bainhira moris iha dame, dezenvolvimentu lao diak, sei lori moris diak ba povu no liberta povu husi kiak no mukit.*

Reportajen: Efizenia da Costa
Editor: Ekipa STL

LEAVE A REPLY

Please enter your comment!
Please enter your name here