OEKUSI, STLNEWS.co – Populasaun iha Rejiaun Administrativu Espesial Oekusi Ambeno (RAEOA) 86% mak asesu ona linha eletrisidade.
Lia hirak nee hatoo husi Prezidente Autoridade RAEOA, Arsenio Bano ba jornalista sira iha Santa Roza RAEOA, Kinta (17/08/2023).
Nia dehan, RAEOA iha 2023 total populasaun hamutuk 87 mil, nee bazeia ba dadus husi sexta bazika no seluk tan.
Tinan 7 liu listrik iha zona sentral nee lakan loron ida oras 3 deit, depois estrada mos la hanesan agora daudaun, liu tiha tinan 7 eletrisidade lakan too ona subdistritu hotu-hotu.
“Agora ami ulun moras oituan ho knua, balu hakarak nia uma lisan nee mos listrik too, entaun ami fahe solar panel, maibe sei esforsu hodi too nafatin,” tenik nia.
Nia dehan, agora daudaun balu mak seidauk asesu tanba dook husi sidade, tanba nee mak atu hatete, Oekusi mudansa boot.
“Hau atu dehan iha RAEOA 86% komunidade mak asesu ona ba linha eletrisidade, balu mak seidauk maibe nafatin esforsu hodi dada hotu linha eletrisidade ba komunidade sira,” katak nia.
Nia dehan, tenki hafurak rai rasik atu nunee ema mai vizita RAEOA karik fila hodi konta tutan konaba RAEOA nia furak.
Nia hatete, tanba Oekusi nee raiketan, entaun politika iha neebe mak buka ema nia preokupasaun.
Iha sorin seluk Xefi Suku Lalisuc, Hermenegildo Lalisuc hateten, durante nee nia observasaun ba Prezidente RAEOA iha nia mandatu nee servisu diak, so ke seidauk iha separasaun konaba estadu nian ho politika.
“Tuir hau observasaun tuir lo-loos nee ita tenki halo separasaun, asuntu politika nian tau ketak no estadu nian tau ketak, nee para hanorin povu nee bele matenek oituan konaba estadu ho politika ninian,”dehan nia.
Nia dehan, depois progarama sira nee tuir lo-loos mai husi Xefi Aldeia no Xefi Suku sira mak foin autoridade sira implementa.
Nia haktuir, konaba infranstrutura sira nee hanesan Xefi suku nia haree seidauk too 50%, foin mak 40% atu asesu suku no aldeia sira. Kuandu koalia konaba infranstrutura, estrada tenki diak, komunidade sira tenki asesu ba saude, edukasaun, bee moos no eletrisidade, ema ho defisiensia, oan kiak sira, ferik faluk tenki iha uma kbit laek.
(mar)
