DILI, STLNEWS.co – Linha eletrisidade neebe mate, laos iha kapital Dili deit, maibe akontese mos iha area remotas, liu-liu Postu Administrativu Atsabe, Munisipiu Ermera, ahi mate too semana tomak mak foin lakan.
Kestaun nee fo sai husi Autoridade Lokal Suku Obulo, Fernando Marques ba STL liu husi telfone, Sesta nee (07/04/2023).
“Eletrisidade iha Postu Atsabe mate too semana tomak, hafoin kalan ida ka rua, no mate fali too semana. Ida nee difikulta ita nia oan sira labele estuda ho diak iha tempu kalan, tan nee husu ba governu atu toma atensaun,” dehan nia.
Nia katak, povu sira tauk, tanba agora deskonfia ninza mos barak. Ahi mate too semana mak fo espasu ema. Aleinde nee difikulta oan sira nia estuda iha tempu kalan, no povu mos labele asesu ba informasaun rai laran, liu-liu rona radio nomos nonton televisaun.
Iha parte seluk, Deputadu Antonio Verdial hateten, los duni iha semana kotuk nia ba halo kontaktu eleitoral iha Suku Hauba, povu hatoo preokupasaun hanesan, dehan ahi mate too semana tomak mak foin lakan, ida nee difikulta oan sira neebe eskola labele estuda ho diak iha tempu kalan.
“Ami foti ona asuntu sira nee iha plenaria, atu nunee governu bele fo importansia,” dehan deputadu nee.
Nia katak, povu halerik dehan ahi mate too semana tomak mak ema nia lilin sira neebe faan iha kios folin tebes, no komunidade tenki sosa tanba atu fasilita oan sira estuda iha tempu kalan.
Nunee mos too notisia nee hatun, STL seidauk hetan konfirmasaun husi parte governu.
(mad)
