PR Haksolok Vizita Eskola Triloka

Prezidente Republika, Francisco Guterres Lú Olo haksolok vizita Eskola Sekundaria Jeral 01 Baucau Trilolo, hodi haree direta kondisaun eskola nee. Dehan Xefe Estadu, liu husi diskursu bainhira halao vizita ba eskola 01 Trilolo, Baucau, Kuarta (16/12/2020). (Foto: Media PR)

BAUCAU, STLNEWS.co – Prezidente Republika, Francisco Guterres Lú Olo haksolok vizita Eskola Sekundaria Jeral 01 Baucau Trilolo, hodi haree direta kondisaun eskola nee. Dehan Xefe Estadu, liu husi diskursu bainhira halao vizita ba eskola 01 Trilolo, Baucau, Kuarta (16/12/2020).

“Hau hakarak hatoo ba ita boot sira hotu katak, Timor Leste liu husi dalan naruk tebes para atu lori prosesu ida nee too mai ita ukun rasik aan, oan sira neebe mak barak iha nee imi seidauk moris, maibe jerasaun inan aman sira nia avo sira nia liu husi dalan ida terus nia no mate nia mak ohin loron ita ukun rasik aan” hatete PR. Lú Olo.

Aman ba nasaun nee hatutan, pontu prinsipal inan, aman no avo sira nia tempu uluk depende too mate mak povu Timor sai matenek, atu kaer tutan ukun rasik aan nee ba oin, ohin loron ida nee sei nafatin hela, saida mak governu ida nee kaer no saida mak orgaun estadu kaer, atu aposta hela nafatin konaba oan sira nia edukasaun.

“So ita nia oan sira nia edukasaun diak mak ita bele liberta ita nia oan sira ba aban bainrua nia, so ita nia oan sira nia edukasaun diak mak aban bainrua ita nia estadu no ita nia rai nee bele buras liu tan, bele diak liu tan ba sira nia moris aban bainrua nian, se ita la matenek ita labele halo buat ida,” tenik aman ba nasaun nee.

Lú Olo dehan, ida nee deit mos la too, maibe presiza kondisaun eskola nia no presiza fatin kadeira no aula, nunee estudante sira tuur ho avontade aprende no simu lisaun.

“Foin Diretor dehan estudante 50 too 60 iha sala ida, hau hanoin ida nee ladun diak, entaun oinsa mak estadu kria kondisaun neebe diak para labarik sira tuur iha sal,a nunee avontade aprende diak liu tan,” katak PR Lú Olo.

Nia dehan, presiza mos kondisaun professores no professora sira presiza meza, armari no material sira seluk para hanorin labarik sira, se laiha kondisaun oinsa mak bele hanorin diak, eskola diak ona sala iha ona presiza mos bee sanitasaun, presiza kondisaun neebe mak diak.

Iha fatin hanesan Diretor Escola ESG 01 Baucau, Paul Dias Menezes hatutan, sira haksolok tebes hodi simu PR Lú Olo.

“Ami husi eskola Sekundaria Jeral 01 Baucau, ida nee ami haksolok no previleju ba Prezidente Republika, Francisco Guterres Lú Olo neebe ohin mai” hatete Diretor Eskola nee.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here