PR Halo Dialogu Ho Povu Ermera

Prezidente Republika, Francisco Guterres Lú Olo halo dialogu aberta premeiru Vez, ho Komunidade iha Munisipiu Ermera, hodi buka solusaun ba problema neebe sira infrenta durante nee. (Foto: Media PR)

ERMERA, STLNEWS.co – Prezidente Republika, Francisco Guterres Lú Olo halo dialogu aberta premeiru Vez, ho Komunidade iha Munisipiu Ermera, hodi buka solusaun ba problema neebe sira infrenta durante nee.

Iha Dialogu nee Prezidente Autoridade Munisipiu Ermera, Jose Martinho Dos Santos lori povu Ermera nia naran hatoo agradese no bemvindu ba Prezidente Republika ho komutiva tomak neebe mak mai hamutuk ho komunidade hodi halo dialogu.

“Hau lori Komunidade Ermera nia naran hatoo bemvindu, ba Prezidente Republika ho espoza no komutiva, neebe mak mai vizita ona Munisipiu Ermera durante loron tolu,” hatete Jose liu husi diskursu,iha salaun Parokia Igreja Nossa Senhora de Grasa, Munisipiu Ermera, Kinta (19/11/2020).

Nia hatutan, iha Munisipiu Ermera hamutuk suku 52 no aldeia 296 no ho nia total populasaun hamutuk rihun atus ida haat nulu.

Tuir nia ohin loron produsaun kafe menus, tanba nee mak hakarak aproveita oportunidade nee, hatoo katak komunidade Ermera iha preokupasaun boot ba produsaun kafe, neebe hanesan kualidade iha mundu, tuir peritu husi amerika hatete kafe Ermera kualidade numeru um iha Mundu.

“Ho vizita PR nian ami hakarak hatoo hela preokupasaun ba aman ba nasaun, ami hein ita boot nia lian hatutan ba governu, kona-ba kafe nia folin kilograma 1, $35 centavos,” katak nia.

Iha fatin hanesan Xefe Casa Sivil, Francisco Maria de Vasconcelos hatutan, objetivu husi vizita ida nee mak Prezidente Republika hakarak rona no hatoo liafuan ruma husi komunidade sira, oinsa atu dezenvolve munisipiu ba oin no promove komprimisiu governu nian husi governu kona-ba kuda ain oan ida, inklui promove hortikultua.

Entretantu liu husi intervensaun Prezidente Republika, Francisco Guterres Lú Olo hatete, nia haksolok tebes hodi hamutuk ho komunidade sira iha Munisipiu Ermera hodi halo Dialogu.

“Dala uluk liu Prezidente Republikak hakarak manifesta nia haksolok boot sira, ohin hamutuk ho hau atu bele halo dialogu nee, PR hahu kampania mai iha Munisipiu nee duni, Munisipiu nee loke odamatan hodi tara tais ba kandidatu ida naran Lu Olo, hodi fo surik meik ida kaibauk Tara ba nia kakorok, hodi imi hotu hateten iha fatin katak ami sei hakarak ita boot nuudar Prezidente ba povu tomak, afirmasaun nee hotu lori hau sai duni PR ba povu tomak,” Hatete Lú OLo.

PR hatutan Dialogu ohin ho kontekstu Dialogu aberta ho povu tomak, diferenta kontekstu ida kontaktu eleitoral la hanesan, lao mos PR atu mai halo fiskalizasaun ka atu hola medidas ruma kona-ba autoridade no komunidade sira halo, nee hatudu katak PR hakarak rona direta saida mak povu sira senti no senti duni.

“Hau lori membru governu sira, laos atu manda sira, maibe atu koopera ho sira, iha nivel nasional, atu hola liafuan, tuir knaar idak nian, maka dialogu nee ita hahu, hau hakarak loke dialogu nee kontekstu tolu, ida agradese ba autoridade munisipiu Ermera organiza dialogu nee, segundu agradese ba populasaun sira hola parte iha dialogu, ida seluk mak dezafiu estadu nian hodi reafirma estadu nian, ikus liu mak situasaun ekonomia ermera nian,” hatete PRLú Olo.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here