PR Vizita Grupu Produtores Hafuku

Prezidente Republika Francisco Guterres Lú Olo ho komitiva vizita Grupu Produtores Haburas Futuru Komunidade iha Suku Triloka, Posto Administrativu Baucau Villa, Munisipiu Baucau. (Foto: Media PR)

BAUCAU, STLNEWS.co – Prezidente Republika Francisco Guterres Lú Olo ho komitiva vizita Grupu Produtores Haburas Futuru Komunidade iha Suku Triloka, Posto Administrativu Baucau Villa, Munisipiu Baucau.

Bainhira Prezidente Republika ho komitiva too iha fatin, simu direita xefe suku no xefe grupu Hafuku ho membru sira, liu husi lian bemvindo no tara tais husi Xefe Suku rasik, no remata kontinua halo vizita ba fatin refere.

Iha vizita nee Xefe Suku Triloka Alexandre da Costa ba jornalista iha Triloka, Kuarta (16/12/2020) hatete sira sente haksolok ho prezensa PR nia, ho prezensa nee oinsa mak bele motiva grupu nee bele lao ba oin.

“Nuudar Autoridade lokal nia sentimentu ho prezensa Prezidente nia diak, tanba ho razaun katak haree direita buat neebe ami halo, no motiva ami oinsa bele hanoin hodi haree kondisaun komunidade sira nia no bele ajuda habelar diak liu tan” hatete Xefe Suku.

Autoridade Lokal nee hatutan grupu hafuku nia atividade mak kuda fehuk segundu forerai, fore neebe mak halo tahu no tempe, tomate, stroberi nomos seluk tan, no sira nia atividade haree mos ba iha mal nutrisaun labarik sira tinan 5 mai kraik.

Xefe Suku hatutan grupu nee harii tinan 10 resin ona no grupu nee komposto husi feto no mane hotu maibe barak liu mak feto, no tuir xefe suku nia hatene hamutuk nain 15 maibe agora aumenta karik nia mos ladun hatene.

Autoridade lokal nee dehan harii grupu nee husi komunidade rasik maibe apoiu husi World Vision.

“Hau rekomenda ba Prezidente neebe mai hanesan aman nasaun mai haree komunidade nia situasaun no karik serbisu ladun diak fo motivu nunee ba oin serbisu diak liu tan.” Hatete nia.

Iha biban nee xefe suku mos hatutan iha Suku Triloka sira mos preokupa ho posto saude tanba oras nee seidauk iha, no sede suku mos uza nafatin tempu Indonezia nia maibe aat ona seidauk hadia nunee mos konaba ahi eletrisidade komunidade maioria hetan ona maibe oituan seidauk hetan.

“Iha nee uma kain 17 mak seidauk asesu ou hetan Eletrisidade tanba dook husi estrada, no asesu ona nee 95% nee ita koalia hanesan nee no 5% mak seidauk asesu” katak nia.

Iha fatin hanesan Xefe Grupu Hafuku Marialinha da Costa Tilman hatutan Hafuko nia naran kompletu mak “Haburas Futuru Komunidade” no grupu nee harii husi nia rasik.

“Grupu Hafuku naran Haburas Futuru Komunidade neebe funda husi hau rasik hanesan koordenador atu halibur feto sira, oinsa atu promove bele aihan lokal sai fila fali ba aihan industria uma nian, atu nunee hahan sira neebe halo husi ita nia toos nee labele abandona no mos hatene atu daan deit, tunu deit maibe, ita mos halo fila fali aihan sai industria uma nian bele tau fulan no loron atu ita bele han.” katak nia.

Nia hatutan aihan lokal neebe iha mak hanesan fehuk, talas, aifarina no mos kulu. Durante halo produsaun nee hahú husi 2014 too mai agora tinan neen tiha ona.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here